आयुर्वेद चिकित्सालयया १०१ दँ पूरा

येँ – थनया न्यतय् च्वंगु आयुर्वेद चिकित्सालय स्थापना जूगु १०१ दँ पूरा जूगु दु । वि.सं. १९७४ बैशाखय् उगु चिकित्सालय स्थापना जूगु खः । चिकित्सालय स्थापना जूगु इलय् प्यंगू श्ययां शुरु जूगुलिइ थौंकन्हय् ११८ श्यया संचालन जुयाच्वंगु दु । आयुर्वेद चिकित्सालयप्रति जनचेतनाया अभावं यानाः थुकिया सेवा काइपिनिगु ल्याः धाःसा उलि अप्वये फयाच्वंगु मदु ।

आयुर्वेद चिकित्साया महत्व बारे आम जनमानसय् चेतना थने मफुगुलिं यानाः सेवा काइपिनिगु ल्याः नं अप्वये मफयाच्वंगु खः । थ्व हे झ्वलय् नेपाल आयुर्वेद चिकित्सा संघं छगू विज्ञप्ती जारी यासें नेपाःया हे दकलय् पुलांगु आयुर्वेद चिकित्सालययात ‘आयुर्वेदया केन्द्रीय विशेषज्ञ चिकित्सालय’ दयेकेत माग याःगु दु ।

संघं जारी याःगु विज्ञप्तीइ आयुर्वेद चिकित्सा उपचारय् दकलय् पुलांगु चिकित्सालयया रुपय् दयाच्वंगु उगु चिकित्सालययात केन्द्रीय विशेषज्ञ चिकित्साल दयेकेमाःगु माग यानातःगु दु । आयुर्वेद चिकित्स पद्दतिपाखें दक्व धइथें ल्वय्या उपचार जुइगु चिकित्सालयया जिकिर दु । आयुर्वेद चिकित्सालयया कथं हेपाटाइटिस, म्हासुल्वय्, पक्षाघात, अलःकै, फिस्टुला, फिसर, ग्याष्टिक थेंज्याःगु ल्वचं कःपिं ल्वगितय्सं अप्वः सेवा कायेगु यानाच्वंगु दु ।

थ्व बाहेकं आयुर्वेद चिकित्सा पद्दतिइ अकुपंचर, फिजियोथेरापी, क्षारसुत्र लगायतया सेवा नं लोकं ह्वाःसां विशेषज्ञस्तरया दरबन्दी थप मजूगुलिं खास हे प्रवद्र्धन जुइ मफुगु चिकित्सालयया धापू दु । लिसें सरकारं नं आयुर्वेद चिकित्सा पद्दतियात प्राथमिकता बियामच्वंगु व थ्व क्षेत्रय् अध्ययन व अनुसन्धानय् बजेट नं म्हो जूगुलिं थुकियात खास हे प्रवद्र्धन याये मफयाच्वंगु सरोकारवालातय् धापू दु ।