मदनकृष्णं ज्वना वल ‘ज्वरा ज्वरा पर्सि’

येँ- ख्यालि जुजु मदनकृष्ण श्रेष्ठ छपु पुलांगु म्ये ज्वनाः पिलू वयेत्यंगु खः । ख्यालि जुजु मदनकृष्णया न्हापा हे अतिकं लोकंह्वाःगु म्येँ हालसालय् रिकर्डि· याःगु खः ।

मदनकृष्णया ‘ज्वरा ज्वरा पर्सि बियां छं छाय् मसिनाः …..’ बोलया उगु इलय् हे लोकंह्वाःगु म्येँ आः नकतिनि रिकर्डि· याःगु खः । उगु म्येँ नांजाःम्ह संगीतकार हरिशरण साय्मिया ‘स्ट्रिंग्स रेकर्डि· स्टुडियोय् रेकर्ड याःगु खः ।

ख्यालिजुजु मदनकृष्णया कथं सन्् १९९०या दशकय् अमेरिकाय् झायादीगु इलय् फ्लोरिडाय् च्वनाच्वंम्ह गंगाबहादुर मालाकारं हालाः न्यंकादीगु जुयाच्वन । अबलय् म्येँग्वः पूमवनाच्वंगु खःसा आः न्हूगु खँग्वः तनाः म्येँयात पूर्णता बियाः छगू न्हूगु व बिस्कंकथंया सवाः बीत कुतः यानागु वय्कलं धयादिल ।

म्येँया च्वमिकथं भाजु मालाकार व मदनकृष्ण निम्हेसियां नां दुथ्याकातःगु दुसा न्हापा मदनकृष्ण थम्हं याकः सलय् हालातःगु म्येँय् आः रोजी डंगोल श्रेष्ठ व सरीता शाहीया नं सः दुथ्याकाः रेकर्ड याःगु खः ।

नांजाःम्ह संगीत संयोजक जीवित जल्मीं एरेन्ज यानादीगु म्येँया म्युजिक भिडियो नं दयेकेगु तयारी जुयाच्वंगु दु । म्युजिक भिडियो दयेकेगु भाला धाःसा नांजाःम्ह निर्देशक रामकृष्ण खड्गीयात जिम्मा बीधुंकूगु दुसा याकनं हे शुटिंगया ज्या न्ह्याकेगु तयारी जुयाच्वंगु दु ।