‘नेपाःमि झी’ म्ये संकिपाया पितब्वज्या जुल

येँ (नेपालभाषा टाइम्स)- महेशमान डंगोल ‘लँजुवाः’ नं च्वयादीगु व वय्कलं हे निर्माण यानादीगु म्ये संकिपा ‘नेपाःमि झी’ या प्रिमियर जूगु दु । आइतवाः सिटिसि मलया सिनेप्लेक्सय् जूगु प्रिमियर ज्याझ्वलय् मू पाहां कथं वरिष्ठ गायक जुजुकाजी रंजित झाःगु खःसा बिशेष पाहाँ कथं वरिष्ठ संगीतज्ञ अमरराज शर्मा झाःगु खः । अथेहे प्रकाश साय्मि व बिजयरत्न असंबरे समीक्षक कथं झायादीगु खः ।

निल शाक्यया लसय् तयार जूगु थुगु म्येय् आशिष डंगोल, सजल महर्जन, कुञ्जनी महर्जन व यज्जु शिल्पकारं सः बियादीगु दु । राष्ट्रिय भावं जाःगु नेपालभाषा संगीत ख्यलय् छगू बिस्कं पहःया थुगु म्ये संकिपाया निर्देशन रामकृष्ण खड्गीं यानादीगु खः । भूपेन्द्र बज्राचार्यं म्यूजिक एरेन्ज यानादीगु थुगु म्येया रेकर्डिङ्ग व मिक्सिङ्ग फिरोज बज्राचार्यं, सम्पादन बालकृष्ण बंशीं यानादीगु खःसा संकिपाया छाँयाकन व कलरिङ्ग रक्की महर्जनं, ग्राफिक्सया ज्या राजन शाक्यं यानादीगु खः ।

भाषा ख्यः व नेवाः संगीत ख्यःया थीथी ब्यक्तित्वपिनि उपस्थिति दुगु ज्याझ्वःया सभापतित्व महेशमान डंगोलं यानादीगु खःसा लसकुस न्वचू रामकृष्ण खड्गीं बियादीगु खः । पाहांपिं जुजुकाजि रंजित, अमरराज शर्मा, प्रकाश साय्मि, विजयरत्न असंबरे, संगीतकार निल शाक्यपिंसं नुगः खँ तयादीगु ज्याझ्वःया संचालन संचारकःमि प्रमिला मानन्धरंं यानादीगु खः ।