ने. सं. ११४४ कौलाथ्व पारू - नःलास्वनेगु

रुसी सेनाया मेम्ह नेपाःमि सैनिक सित

येँ (नेपालभाषा टाइम्स)- रुसी सेनाय् भर्ना जुयाच्वंम्ह छम्ह मेम्ह नेपाःमि सीगु दु । वंगु स्वला न्ह्यः रुसी सेनाय् भर्ना जूम्ह कैलाली टिकापुर नगरपालिका–१ या भरत शाह सीगु खः । शाह मदुगु खबर छेँजःपिसं वंगु शुक्रवाः जक सिउगु खः ।

मदुम्ह शाहया किजा मंगल शाहया कथं भरतलिसे ज्या याइम्ह कञ्चनपुरया रविन थापां थुकिया जानकारी बिउगु खः । थापां वंगु छुं न्हि न्ह्यः थः जहानयात भरत मदुगु जानकारी याकूगु खःसा वयां लिपा भरतया छेँजःपिंत जानकारी वःगु खः ।

भरत सीगु बारे परराष्ट्र मन्त्रालय व रुसी सरकारं छेँजःपिंत औपचारिक रुपं जानकारी धाःसा याकूगु मदुनि । मदुम्ह भरत न्हय्दँ नेपाल प्रहरीइ जागिर नयाः स्वदँ न्ह्यः राजीनामा बियाः दुबई वनाः गार्डया ज्या यानाच्वंगु खःसा वंगु स्वला न्ह्यः रुसी सेनाय् भर्ना जूगु खः । छेँजःपिंसं भरतया कुशया सीम्ह दयेकाः वंगु आइतवाः अन्त्येष्टि यायेधुंकूगु दु ।

थ्वहे झ्वलय् राष्ट्रिय मानव अधिकार आयोगं रुस व युक्रेन दथुइ न्ह्यानाच्वंगु युद्धय् ब्वति कयाच्वंपिं नेपाःमिया उद्धार यायेत सरकारयात इनाप याःगु दु । छुं नेपाःमि रुसी व युक्रेनी सेनाय् भर्ना जूगु व युक्रेनी सेनाया आक्रमणय् लानाः छुं नेपाःमि सीगु व छुं घाःपाः जूगु धासें उगु युद्धय् ब्वति काःपिं नेपाःमिया उद्धार यायेत आयोगं इनाप याःगु खः ।

आयोगं म्हिगः पिथंगु विज्ञप्तिइ धयातःगु दु, ‘नेपाःमि नागरिक न्ह्याथाय् न्ह्याग्गु हे अवस्थाय् दुसां नं उमिगु मानव अधिकारया संरक्षण व उद्धार यायेगु सरकारया कर्तव्य जुइ ।’ उकथं हे विज्ञप्तिइ युद्धय् लानाः मदुपिनिगु सीम्ह स्वदेश हयाः थःगु संस्कार कथं दाहसंस्कार यायेगु व्यवस्था मिले यायेत, घाःपाः जूपिनिगु वासः यायेगु निंतिं प्रभावकारी पहल यायेत व स्वदेश लिहां वये न्ह्याःपिंत कुटनीतिक कुतःपाखें स्वदेश लिहां वयेगु व्यवस्था यायेत नं सरकारयात इनाप याःगु दु ।