सरकार निरंकूश जुइगु संकेत

येँ-  नेकपाया नेतृ रामकुमारी झाक्रीयात म्हिगः ज्वनेवं राजनीतिइ तरङ ब्वलंगु दु । व्यापक दबाबया कारणं वय्कःयात म्हिगः हे त्वःता नं हःगु दु । झाँक्रीयात ज्वंगु खँयात कयाः ब्यापक दबाब सिर्जना जुइवं प्रहरीं वय्कःयात त्वःता हःगु खः ।

नेतृ झाँक्रीं सार्वजनिक रुपं राष्ट्रपति विरुद्ध अभिव्यक्ति बियादीगु कारणं वय्कःयात ज्वंगु खँ धाःगु दु । तर वय्कःयात ज्वनेवं जनताया अभिव्यक्ति स्वतन्त्रता हनन् जुल धकाः प्यखेरं विरोध जूगु खः ।

झाँक्रीयात ज्वनेत प्रहरी म्हिगः सुथय् हे वय्कःया छेँय् वंगु खःसां झाँक्रीं थःत ज्वनेत अदालतया पक्राउ पुर्जी माः धायेवं प्रहरीं लिहां वनाः पक्राउ पुर्जी हयाः ज्वना यंकूगु खः । झाँक्रीयात राज्यविरुद्ध कसुरया द्वपं बिउगु दु । झाँक्रीयात ज्वनेवं थीथी राज–नीतिक दलया नेतातय्सं विरोध याःगु दु । नेकपा दाहाल–नेपाल पुचलं थः केन्द्रीय दुजः झाँक्रीयात तत्काल त्वःतेत मागु याःगु खः ।

उकथं हे जनता समाजवादी पार्टीया नेता लिसें पुलांम्ह प्रधानमन्त्री डा. बाबुराम भट्टराईनं ‘संविधानं प्रत्येक नागरिकयात विचार व अभिव्यक्ति स्वतन्त्रता बिउगु दु, तर राष्ट्रपतिं उकियात उल्लंघन याःगु धासें झाँक्रीयात त्वःतेत इनाप यानादीगु खः । अथे हे नेपाली कांग्रेसया वरिष्ठ नेता रामचन्द्र पौडेलं झाँक्रीयात ज्वनाः सरकारं अधिनायकवादी चरित्र क्यंगु द्वपं बियादीगु दु । अथे हे राप्रपाया अध्यक्ष कमल थापां नं नेतृ झाँक्रीयात तत्काल त्वःतेत सरकारयात मागु यानादीगु खः ।

सर्वोच्चय् निवदेन दर्ता
थ्वहे झ्वलय् नेतृ झाँक्रीयात त्वःतेमाःगु माग यासें सर्वोच्च अदालतय् निवेदन दर्ता जूगु दु । झाँक्रीयात ज्वंगु विरुद्ध अधिवक्ता गुणराज आचार्यं बन्दी प्रत्यक्षीकरण निवेदन कयाः सर्वोच्च अदालत वंगु खः । उगु निवेदन सर्वोच्च प्रशासनं दर्ता याःगु व आइतवाः पेसी नं क्वःछिउगु खः ।

मानवाधिकारया च्यूताः
झाँक्रीयात प्रहरीं ज्वंगु खँ सार्वजनिक जुइवं राष्ट्रिय मानवअधिकार आयोगया पुचः महानगरीय अपराध महाशाखाय् वंगु खः । अन पुचलं प्रहरीलिसे झाँक्रीया कसुर बारे न्यनेकने याःगु खः । झाँक्रीया गिरफ्तारीयात आयोगं नं आलोचना याःगु दु ।

झाँक्रीयात ज्वंगु विरोधय् प्रदर्शन
नेकपाया केन्द्रीय दुजः रामकुमारी झाँक्रीयात त्वःतेमाःगु माग यासें म्हिगः येँय् विरोध प्रदर्शन समेत जुल । फिब्व ख्यलं बानेश्वरपाखे वंगु नेकपाया युवा विद्यार्थीतय् उगु प्रदर्शनं निषेधित क्षेत्र त्वाःथलेगु कुतः याःगु खः । प्रदर्शनया झ्वलय् प्रहरी व प्रर्दशनकारी दथुइ घ्वात्तुघ्वायेगु ज्या जूगु खःसा प्रदर्शनकारीतय्सं सरकार विरुद्ध नाराबाजी नं याःगु खः ।

सम्बन्धित बुखँ

LEAVE YOUR COMMENTS