ओली तत्कालया निंतिं पद बचे यायेत सफल

सचिवालय बैठकय् बामदेवयात प्रतिनिधि सभाय् यंकेगु निर्णय

येँ – प्रधानमन्त्री केपी शर्मा ओलीया पद तत्कालया निंतिं बचे जुइगु जूगु दु । नेकपा सचिवालयया थौं च्वंगु बैठकं पार्टी उपाध्यक्ष बामदेव गौतमयात प्रतिनिधि सभाय् यंकेगु निर्णय यायेवं ओलीया पद तत्कालया निंतिं बचे जूगु खः ।

सचिवालयया बैठक लिपा सचिवालयया दुजः व पार्टी प्रवक्ता नारायणकाजी श्रेष्ठं प्रेस ब्रिफिङ यासें सचिवालयं बामदेव गौतमयात उपयुक्त इलय् प्रतिनिधि सभाय् यंकेगु निर्णय याःगु खँ धयादीगु खः । लिसें वय्कलं स्थायी कमिटी बैठक वइगु वैशाख २५ गते जुइगु व थुगु बैठकया तयारीया निंतिं २४ गते ३ बजे तयारी बैठक च्वनीगु खँ नं धयादीगु दु ।

प्रधानमन्त्रीया पद त्वतके बीगु निंतिं नेकपाया मेम्ह अध्यक्ष पुष्पकमल दाहाल प्रचण्ड व सचिवालय दुजः माधव नेपालया पुचलं ओलीयात दबाब तच्वयेका हयेवं बुधवाः च्वंगु सचिवालय बैठकय् ओलीं बामदेवयात प्रधानमन्त्री दयेकेगु प्रस्ताव हःगु खः । प्रचण्ड व नेपालया पुचःयात तछ्यायेगु ताः तयाः ओली बामदेवयात प्रधानमन्त्री दयेकेगु प्रस्ताव हःगु खः ।

प्रवक्ता श्रेष्ठं प्रेस ब्रिफिङया झ्वलय् बामदेवयात प्रधानमन्त्री दयेकेगु हे ताः तयाः प्रतिनिधि सभाय् यंकेगु निर्णय जूगु खँ धयादीगु खः । वय्कलं धयादीगु दु, ‘कमरेड बामदेवयात प्रतिनिधि सभाय् यंकेगु निर्णय जूगु धयागु स्वाभाविक रुपं वय्कःयात प्रधानमन्त्री दयेकेगु निंतिं हे खः नि ।’

थ्व प्रस्तावयात यक्वस्यां विश्वास यानामच्वंगु खःसा प्रचण्ड–नेपाल पुचलं नं थ्व प्रस्तावय् ओली गुलि तक पक्का दुगु धयागु स्वयेमानि धयाच्वंगु खः । थौंया बैठकय् छु गज्याःगु खँ जुल धाःसा पिहां मवःनिसां बामदेवयात प्रतिनिधि सभाय् यंकेगु निर्णय धाःसा जूगु दु । बामदेवयात प्रधानमन्त्री दयेकेगु निंतिं कि प्रतिनिधि सभाय् सांसद दयेकेमाः, कि मखुसा राष्ट्रिय सभाया दुजः दयेकाः संविधान हे संशोधन यायेमाःगु जुइ ।

संविधान संशोधन यायेगु सम्भावना तसकं म्हो जक दुगुलिं आः गुगुं छगू थासय् नेकपाया सांसद छम्हेसित राजीनामा बीकाः उपचुनाव यानाः बामदेवयात थनेमाःगु जुइ । उपचुनावय् त्यात धाःसा जक बामदेव प्रधानमन्त्री जुइगु सम्भावना दइ ।

आः तत्कालया निंतिं धाःसा प्रधानमन्त्री ओलीं थःगु पद बचे यायेत छ्यःगु अस्त्र सफल जूगु खनेदुगु दु । तर बामदेवया प्रधानमन्त्री जुइगु इच्छा पूवनी हे धयागु धाःसा पक्का मदुनि ।