रेडियो ःन्यनामि म्हो, महत्व अप्वः

म्हिगः फागुन १ । ईश्वी संवत्कथं फेब्रुअरी १३ तारिख । थ्व न्हियात दँय्दसं विश्व रेडियो दिवसया रुपय् माने यायेगु याना वयाच्वंगु दु । सूचना व प्रविधिया विकासलिसें रेडियो न्यनीपिं न्यनामिपिं म्हो जूसां रेडियोया महत्व धाःसा अझं कुहां वःगु मदुनि । नेपालय् रेडियो स्थापना जूगु नं खुगू दशक पुले धुंकूगु दु । शुरुशुरुइ सूचना व प्रविधिया विकास बांलाक जूगु नं मदुनि । उकिं उगु इलय् रेडियोया तःधंगु महत्व दुगु खः । आः नं महत्वया ल्याखं स्वयेगु खःसा एफएम रेडियो न्ह्यःहे लाःगु नेपाल पत्रकार महासंघया केन्द्रीय सचिव शीतल महतों धयादी ।

अनलाइन, पत्रिकाया थः हे ब्वँमि व टेलिभिजनया नं थः हे स्वकुमिपिं, न्यनामिपिं दुसां नं रेडियोया बिस्कं न्यनामिपिं दुगु व इमिगु ल्याः म्हो मजूगु वय्कलं धयादी । ‘सहज पहुँचया ल्याखं नं सर्वसाधारणया निंतिं विश्वस्त सूचनाया आधार धइगु हे रेडियो खः’ सचिव महतों धयादी । चितवनया न्हापांगु रेडियो स्टेशन सिनर्जी एफएमया स्टेशन म्यानेजर अमर प्रधान रेडियोया न्यनामिपिं म्हो जूसां उकिया महत्व धाःसा आतक नं उत्तिकं दुुगु धयादी । आतक नं उलि हे दंक, सहज व सरल सूचना प्राप्त यायेगु माध्यमया रुपय् दुगु रेडियो न्हापांगु थासय् लानाच्वंगु वय्कलं दावी यानादी । लिपांगु इलय् धाःसा मोबाइलय् हे विश्वया दक्वं सूचना वइगु जूगुलिं रेडियोया स्रोता धाःसा म्हो जुजुं वनाच्वंगु दु ।

अनलाइन माध्यम थौंकन्हय् प्रभावकारी जुया वनाच्वंगु दु, अय्नं दक्वं पत्रिका व अनलाइन माध्यमत गांया पहुँचय् धाःसा थ्यने फयाच्वंगु मदु । थ्यंसां नं तसकं अप्वः खर्च जुयाच्वंगु दु । नेपाल पत्रकार महासंघया जिल्ला अध्यक्ष राधेश्याम खतिवडां सहर बजारय् रेडियो न्यनीपिं न्यनामिपिं म्हो जूसां अझ गां गामय् सूचनाया माध्यम रेडियो हे जूगु धयादी । वय्कःया कथं चितवनय् जक झिंप्यंगू रेडियो स्टेशन दु । छुं छुं चालीगु क्रमय् दु । उकी बछि धयाथें सामुदायिक रेडियो दु । आः नं मुख्य यानाः जिल्लाय् सिनर्जी व कालिकालिसें त्रिवेणी, हाम्रो एफएम, रेडियो चितवन, अर्पण, ग्रेट एफएम, रेडियो नारायणी, माडी एफएम, ड्रिम्स एफएम लगायत रेडियो संचालनय् दु ।

२०५८ साल कात्तिक २६ गते चितवनया इतिहासय् दकलय् न्हापांगु रेडियो सिनर्जी एफएम प्रशारणय् वःगु खः । वयां दछि लिपा कालिका एफएम संचालनय् वल । वयां लिपा छसिकथं मेमेगु रेडियो नं प्रशारणय् वयेगु शुरु जूगु खः । सिनर्जी एफएम स्वनिगलं पिनेया हे खुगूगु व नेपाःया झिंप्यंगूगु रेडियोया रुपय् स्थापना जूगु स्टेशन म्यानेजर प्रधानं धयादी । उगु इलय् सूचनाया महत्वपूर्ण माध्यम धइगु हे रेडियो खः । लोकतन्त्रया स्थापनाय् नं रेडियोया थःगु हे कथंया बिस्कं भूमिका दुगु प्रधानं धयादी । लिपांगु इलय् त्वाः त्वालय्, वडा वडा, रेडियो चायेकेगु चलनं अस्वस्थ प्रतिस्पर्धा ब्वलंका हयाच्वंगु प्रधानं धयादी ।

प्रविधिया कारणं रेडियोया आकर्षण कुहां वःसां नं पहुँचय् धाःसा आतक नं न्हापांगु थासय् हे दुगु स्टेशन म्यानेजर प्रधानया दावी दु । लिपांगु इलय् लाक्वपाक्व धंगं रेडियो चालेगु क्रम अप्वया वनाच्वंगु दु । ज्याझ्वःया गुणस्तरीयताय् ध्यान मबिउगुलिं रेडियोप्रति हे वितृष्णा नं ब्वलनाच्वगु दु । अथे हे रेडियों स्थानीय मुद्दायात नं ल्ह्वने फयाच्वंगु मदु । नेपालय् २००३ सालय् रेडियो प्रशारण शुरु जूगु खः । वि.सं. २०५२ सालंनिसें धाःसा एफएम रेडियो प्रशारण शुरु जुल । स्पेनया प्रस्तावय् युनेस्कोया ३६ क्वःगु सम्मेलनं पारित याये धुंकाः दँय्दसं फेब्रुअरी १३यात विश्व रेडियो दिवसया रुपय् माने याना वयाच्वंगु खः ।

सम्बन्धित बुखँ

LEAVE YOUR COMMENTS