चीनय् उपप्रमया स्वास्थ्य सामान्य

येँ (नेपालभाषा टाइम्स)-चीन भ्रमणय् झाःम्ह उपप्रधान लिसें गृहमन्त्री नारायणकाजी श्रेष्ठ हृदयाघात जुयाः अस्पताल भर्ना जुयादीगु दु । पेकिङ युनियन मेडिकल कलेज अस्पतालं जारी याःगु वक्तव्य कथं उपप्रम श्रेष्ठयात एक्युट मायोकार्डियल इन्प्र¥याक्सन जूगु व आकस्मिक कारोनरी एन्जियोग्राफी यायेगु झ्वलय् छगू धमनीइ ब्वकेज खनेदुगु दु ।

उपप्रम श्रेष्ठया नुगःचुया जवय् च्वंगु धमनीइ ‘स्टेनोसिस’ नं खनेदुगु दु । उकिया नितिं ‘स्टेन्ट’ तयेधुंकूगु खँ अस्पतालं धाःगु दु । वय्कःयात निरन्तर निगरानी व वासः यायेगु निंतिं मेडिकल आईसीयुइ तयातःगु दु । वय्कःया अवस्था सामान्य दुगु खँ नं अस्पतालं धाःगु दु ।

‘स्वक्वःगु बेल्ट एन्ड रोड फोरम फर इन्टरनेशनल को अपरेशन (बीआरएफ) स ब्वति कायेत उख झाःम्ह उपप्रम श्रेष्ठयात बुधवाः चान्हय् हृदयाघात जूगु खः । चिनियाँ सरकारं उच्चतम प्रविधि नालेगु व वासः यायेगुली विशेष ध्यान बीत अस्पताल प्रशासनयात निर्देशन बिउगु दु ।