ने. सं. ११४४ कौलाथ्व दशमी - स्याक्वत्याक्व

बँपसः विरुद्ध स्थानीय दना वल

यल (नेपालभाषा टाइम्स)- बँपसः विरुद्ध स्वनिगःया स्थानीय जनता गुलि आक्रोशित जुयाच्वंगु दु धइगु खँ म्हिगः यलय् जूगु प्रदर्शनपाखें अझ प्रत्यक्ष सी दत । यल महानगरपालिकां बँपसः चीकेगु धकाः शुरु याःगु अभियानयात स्थानीय जनतां पूवंक हे समर्थन याःगु जक मखु, बँपसः तयेकेमाः धकाः यल मनपाया ज्याकू न्ह्यःने दनाः प्रदर्शन याःम्ह अभियन्ता ईयात समेत अन च्वने दइ मखु धकाः आक्रोश प्वंकल ।

अभियन्ता ईं बँपसः तये दयेमाः धइगु माग यासें थनिंनिसें दनाः प्रदर्शन याइगु धायेवं यलया स्थानीय जनता नं ब्यानर सहित मनपा ज्याकू न्ह्यःने वनाः फुटपाथ धइगु मनू न्यासि जुइगु थाय् खः, पसः तयेगु थाय् मखु धकाः प्रदर्शन याःगु खः । उमिसं अन दनाच्वंम्ह अभियन्ता ईयात समेत न्ह्यःने वनाः विरोध यायेवं प्रहरीं ईयात सुरक्षाया लागिं ज्वनाः थःपिनि ज्याकुथिइ तयेयंकूगु खः । अभियन्ता ईं अन १०८ मिनेट दनाः प्रदर्शन यायेगु कार्यक्रम पित बिउगु खः । तर स्थानीय जनतां ईं ब्वयातःगु ब्यानर समेत लिकयाः खुना बीवं स्थिति तनावपूर्ण जूवंगु खः ।

अभियन्ता ईं थ्व स्वयां न्ह्यः येँय् नं मनपा ज्याकू न्ह्यःने दनाः अथे हे प्रदर्शन याःगु खःसा लिपा मनपां वय्कःलिसे वार्ता यानाः बँपसः तयेके बीगु विषयय् छगू सहमति दयेकूगु खः । तर मनपां उगु सहमति धाःसा पालना मयाः ।

येँय् बँपसः तयेके मबीवं येँया बँपसल्यात फुक्क यलय् वयाः पसः तःवःगु खँ यल मनपां धाःगु दु । यलय् बँ पसल्यात अप्वया वयेवं मनपां मंगलंनिसें लगं ख्यः तकया लँय् बँपसः तयेके मबीगु धकाः घोषणा याःगु खः । यलय् थ्व लँपु छपु बाहेक मेमेगु थासय् अझ नं निश्चित थाय् तोके यानाः निश्चित ई तक बँपसः तयेके बियातःगु दनि ।