बन्दीतय्सं दयेकातःगु बुद्ध मूर्ति लःल्हात
किपू- थाइल्याण्डया थीथी जेलय् सजाय स्वरुप कुनातःपिं थीथी बन्दीतय्सं दयेकूगु बुद्धया मूर्ति नेपाःयात लःल्हाःगु दु । म्हिगः थनया नगरमण्डप श्रीकीत्ति विहारय् छगू ज्याझ्वः यासें नेपाःया थीथी विहार, बौद्ध संघ संस्था व स्कूलतय्त उगु बुद्ध उपहार स्वरुप मूर्ति लःल्हाःगु खः ।
पुलांम्ह प्रधानमन्त्री लिसें नेपाल कम्युनिष्ट पार्टीया वरिष्ठ नेता माधवकुमार नेपालं उगु बुद्ध मूर्ति लःल्हानादीगु खः । थाइल्याण्डया वल्र्ड बुद्धिष्ट विश्वविद्यालयया सौजन्यं उगु बुद्ध मूर्ति नेपाः हयाः इनेगु ज्या जूगु खः ।
थाइल्याण्डया वल्र्ड बुद्धिष्ट विश्वविद्यालयं धाः कथं थ्व बुद्ध मूर्ति थाइल्याण्डय् थीथी अपराध याःगु कारणं कुना तःपिं बन्दीतय्सं दयेकूगु खः । थ्व मूर्ति दयेकूपिं बन्दीत मध्ये गुलिखे बन्दीत मृत्युदण्डया सजाय न्यंकाः मृत्युदण्डया न्हि पियाच्वंपिं खः ।
थ्व बन्दीतय्सं वंगु १८० न्हि तक लगातार ज्यायानाः थ्व मूर्ति दयेकूगु खः । उपिं मार्फत विश्वय् शान्तिया सन्देश प्रवाह यायेगु ताः तयाः थज्याःगु मूर्तित नेपाः लगायत विश्वया थीथी देशय् लःल्हायेगु ज्या जुयाच्वंगु खः । थ्व बुद्ध मूर्ति नेपाःया भद्रगोल, नख्खु व डिल्लीबजार कारागारयात नं लःल्हाःगु दु । ज्याझ्वलय् सांसद कृष्णगोपाल श्रेष्ठ, पुलांम्ह मन्त्री डा. केशवमान शाक्य, थाइल्याण्डं बिज्याःम्ह भिक्षु डा. सुगन्ध महास्थविर लिसें नेपाःस्थित थाई राजदूतावासया पदाधिकारीपिं नं दीगु खः ।
LEAVE YOUR COMMENTS