एमालेया पूर्व माओवादी चिन्तित

येँ-विभाजनया सतिक थ्यनाच्वंगु नेकपा –एमाले) हानं एकताया लागिं प्रक्रिया न्ह्यानाच्वंगु इलय् अन दुहां वंपिं पूर्व माओवादी नेतातय्गु भविष्य छु जुइगु खः धइगु खँय् चिउताः ब्वलंगु दु । छुं जुयाः एमाले हानं एकता जुयाः माधव नेपाल पुचः पुनः पार्टीइ दुहां वल धाःसा थःपिनिगु भविष्य छु जुइ धयागु खँय् वय्कःपिं चिन्तित जुयाच्वंगु खँ सूत्रं धाःगु दु ।

थःगु सरकार संकटय् लायेवं प्रधानमन्त्री ओली धमाधम क्वमिलु जुया वयाच्वंगु व नेपाल पुचःया माग स्वीकार यायां वयाच्वंगु कारणं कन्हय् थःपिंत मछिनी कथंया माग समेत स्वीकार याइगु खः लाकि धइगु ग्याःचिकु ब्वलनाच्वंगु खँ धाःगु दु ।

अथे खःसां पार्टी अध्यक्ष केपी ओलीं आः तक पूर्व माओवादी नेतातय्त त्वःता छ्वयेगु कथंया छुं ज्या यानादीगु मदुनि । म्हीग वय्कलं जारी यानादीगु ‘असाधारण’ निर्णय सहितया आह्वानय् नं पूर्व माओवादी नेतातय्त पार्टी एकताया हे अंगया रुपय् स्वीकार याये मालीगु खँ न्ह्यथनादीगु दु । माधव नेपाल पुचलं वि.सं. २०७५ या जेठ २ गतेया अवस्थाय् पार्टी लित यंकेमाः धयाच्वंसां ओलीं जेठ ३ गतेया अवस्थाय् लित यंकेत तयार दु धकाः स्वीकृति बियादीगु दु ।

अथे खःसा नेपाल पुचलं ओलीया थ्व प्रस्तावयात अझं स्वीकार याःगु मदुनि । उमिसं जेठ २ गतेया हे अवस्थाय् लिहां वनेमाः धकाः अडान कयाच्वंगु दु । नेपाल पक्षया थ्व अडानयात कयाः ओलीं आः तक छुं न्ववाःगु मदुनि । थःगु सरकार धाथें संकटय् लात धाःसा वय्कलं उगु माग नं स्वीकार यानादीगु खः लाकि धइगु ग्याःचिकु धाःसा पूर्व माओवादी नेतातय्त जुयाच्वंगु खँ धाःगु दु ।
सर्वोच्च अदालतया फैसलां पूर्व माओवादी सकलें नेतातय्त मन्त्री पदं च्यूत याना बिउगु खः । उमिगु लागिं थ्व छगू तःधंगु मार खः । आः थ्वयां लिपा पार्टीइ नं च्वने मखन धाःसा मेगु मारय् लाइगु ग्याःचिकु उमित जुयाच्वंगु खँ धाःगु दु ।

थ्वहे अवस्थाय् पूर्व माओवादी नेतातय्सं आः थःपिं माओवादीइ हे लिहां वनेगु खः लाकि धकाः समेत बिचाः शुरु याना हःगु खँ सीदुगु दु । थ्व झ्वलय् पूर्व माओवादी नेता टोपबहादुर रायमाझीं थःत हानं माओवादी केन्द्रय् हे दुहां वये माली धकाः इनाप यासें उगु पार्टीया अध्यक्ष पुष्पकमल दाहालयात ‘सन्देश’ समेत छ्वयेधुंकूगु खँ सीदुगु दु । तर रायमाझीया इनापयात दाहालं धाःसा अस्वीकार यानादीगु खँ धाःगु दु । दाहालं रायमाझी व रामबहादुर थापा निम्हं थःगु पार्टीयात आवश्यक मजू, उपिं निम्हं आः गन दुगु खः अन हे च्वनाच्वँ धकाः लिसः बियाछ्वःगु खँ नं सीदुगु दु । थ्वहे निम्हेस्यां यानाः पार्टी दुने कचवं पिहां वःगु खः धासें वय्कलं मेपिंत दुकाःसां थ्व निम्हेसित धाःसा दुमकायेगु सन्देश बियादीगु खँ सूत्रं धाःगु दु ।