ने. सं. ११४६ बछलाथ्व चौथी - बुंगद्यः सालिगु

ओली सिबें दाहालपाखें अप्वः घोषणा

दुना वंगु पीडितया छेँ फुक्क सरकारं दयेका बीगु

येँ – बारा व पर्साय् आइतवाः बहानी वःगु धाकुफसं थुना बिउगु पीडिततय् छेँ सरकारं दयेकाबीगु जूगु दु । धाकुफसं प्राभावित स्थानीय जनताया छेँ सरकारं दयेका बीगु घोषणा म्हिगः सत्तारुढ दल नेकपाया अध्यक्ष पुष्पकमल दाहालं यानादीगु खः । वय्कलं म्हिगः सुथय् जक प्रधानमन्त्री केपी ओलीलिसे थःगु खँल्हाबल्हा जूगु खँ कनादिसें उकिया जानकारी पीडित जनतायात याकादीगु खः ।

तर म्हीग च्वंगु मन्त्रिपरिषद्या बैठकं धाःसा अज्याःगु छुं नं निर्णय याःगु मदुनि । प्रधानमन्त्री केपी ओली सहित मन्त्रीत धाकुफसं प्रभावित क्षेत्रया भ्रमण यानाः लिहां वयेधुंकाः च्वंगु मन्त्रिपरिषद्या बैठकय् राहतया खँ स्वयां नं अन धाकुफय् गुकथं वल धइगु बारे अप्वः ब्रिफिङ जूगु खः । बैठकं घाःपाः जूपिनिगु उपचार खर्च व्यहोरे यायेगु, राहत व उद्धारय् गुगुं नं कथंया कसर मल्यंकेगु व तथ्यांक संकलनया निंतिं गृह मन्त्रालययात निर्देशन बीगु निर्णय याःगु खः ।

पीडित जनतां धाःसा केन्द्र सरकारपाखें राहतया प्याकेज घोषण जुइ धकाः आशा यानाच्वंगु खः । लिसें प्रदेश नम्बर २ या सरकारं नं केन्द्र सरकारपाखें प्याकेज घोषणा जुइगु अनुमान याःगु खः । तर केन्द्रं अज्याःगु छुं हे घोषणा मयाःगुलिं केन्द्र सरकारप्रति प्रदेश सरकार रुष्ट जुयाच्वंगु दु । मेखे केन्द्र सरकारं प्याकेजय् राहत घोषणा मयाःगुलिं नेपाल कम्युनिष्ट पार्टीया नेतातय्सं नं असन्तुष्टि प्वंकूगु खँ सीदुगु दु ।

केन्द्र सरकारं राहत घोषणा मयायेवं दाहाल थःहे प्रभावित क्षेत्रय् वने न्ह्यः सुथय् बालुवाटार वनाः प्रधानमन्त्री लिसे सहलह यानादीगु खः । उगु सहलह लिपा हे दाहालं छेँ दयेकाबीगु घोषणा याःगु खँ नेकपा सूत्रं धाःगु दु । लिसें दाहालं सीपिनि छेँजःपिंत न्यागू–न्यागू लाख तका आर्थिक ग्वाहालि यायेगु घोषणा नं यानादीगु दु ।
घटनास्थलय् प्रधानमन्त्री ओली वंगु इलय् स्वयां नं नेकपाया निम्हम्ह अध्यक्ष दाहाल वंगु इलय् राहत सम्बन्धी अप्वः खँ घोषणा जूगुलिं थुकियात सरकारं पूवंकीगु खः लाकि मखु धइगु नं आशंका पिहां वःगु खँ धाःगु दु ।

अथेहे धाकुफसं पीडित २ नम्बर प्रदेशया जनतायात ३ नम्बर प्रदेश सरकारं १ करोड तका आर्थिक ग्वाहालि यायेगु घोषणा याःगु दु । अथे हे सुदूरपश्चिम प्रदेश सरकारं नं १ करोड तका ग्वाहालि यायेगु घोषणा याःगु दु । निगुलिं प्रदेशया मन्त्रिपरिषद्या बैठक लिपा उगु घोषणा याःगु खः ।