ने. सं. ११४४ ञलाथ्व दशमी -

माथिल्लो तामाकोशीया शेयर चैतं पिहांवइगु

येँ- माथिल्लो तामाकोशी जलविद्युत आयोजनां याकनं हे सर्वसाधारण व आयोजना प्रभावितपिनि निंतिं शेयर जारी यायेत्यंगु दु । आयोजनां निगू अर्ब ६३ करोड ८५ लाख तका बराबरया आइपिओ जारी यायेत्यंगु खः ।
राष्ट्रिय गौरवया आयोजना धयातःगु थ्व आयोजनां न्हापांगु चरणय् प्रभावित दोलखा जिल्लावासी व सर्वसाधारणया निंतिं साधारण शेयर पितबीत्यंगु खः । आयोजना दयेकाच्वंगु माथिल्लो तामाकोशी हाइड्रोपावरया कम्पनी सचिव रामसुन्दर श्रेष्ठं वइगु चैतया न्हापांगु वालय् हे शेयर पितबीगु निंतिं ज्या जुयाच्वंगु खँ धयादीगु दु ।

श्रेष्ठया कथं आयोजना प्रभावित स्थानीय दोलखावासीतय् निंतिं कूल पुँजीया १० प्रतिशत साधारण शेयर बी । थ्व ल्याखं स्थानीय वासिन्दां १ अर्ब ५ करोड ९० लाख तका बराबरया १ करोड ५ लाख ९० हजार कित्ता साधारण शेयर कायेखनी । अथे आयोजनां सर्वसाधारणया निंतिं कूल पुँजीया १५ प्रतिशत साधारण शेयर बीत्यंगु दु । थ्व ल्याखं सर्वसाधारणया निंतिं १ अर्ब ५८ करोड ८५ लाख तका बराबरया १ करोड ५८ लाख ८५ हजार कित्ता शेयर पितबी ।

स्थानीय वासिन्दा व सर्वसाधारणयात छुटे यानातःगु १० व १५ प्रतिशत साधारण शेयर मीधुंकाः जक कर्मचारीयात मिउगु शेयर नेपाल स्टक एक्स्चेञ्जय् सुचीकृत जुइगु खँ धाःगु दु ।

शेयर पितबीगु निंतिं कम्पनीं वंगु कात्तिकय् हे नेपाल धितोपत्र बोर्डय् आवेदन बिउगु खः । धितोपत्र बोर्डं छन्हु निन्हुं हे स्वीकृति वइगु जानकारी बियादिसें कम्पनी सचिव श्रेष्ठं स्वीकृति वयेवं आह्वानपत्र सार्वजनिक यायेगु तयारी जुयाच्वंग्ु खँ धयादीगु दु ।

आयोजना प्रभावित स्थानीय वासिन्दायात शेयर बीगु निंतिं कम्पनीं अति प्रभावित, प्रभावित व म्हो प्रभावित यानाः स्वंगू ब्वय् ब्वथलातःगु दु । थ्व कथं गौरीशंकर गाउँपालिकाया लामाबगर व गोंगरयात अतिप्रभावित, प्रवेश मार्ग व प्रशारण लाइन थिउगु क्षेत्रयात प्रभावित व आयोजनां छुं लिच्वः मलाइगु जिल्लाया मेमेगु भूभागयात म्हो प्रभावित कथं ब्वथलातःगु दु । कम्पनीं धाःकथं स्थानीयवासीतय्सं न्यूनतम ३० निसें ३०० कित्ता तक शेयर आवेदन बीफइ ।

दोलखाय् दयेकाच्वंगु ४५६ मेगावाट क्षमताया माथिल्लो तामाकोशी जलविद्युत आयोजना आःतकया दुने ९४ प्रतिशत भौतिक निर्माण क्वचायेधुंकूगु दु । आः आयोजनाया सुरुङ बल्लाकेगु ज्या जुयाच्वंगु खँ प्रवक्ता डा. गणेश न्यौपानें धयादीगु दु । ३१० व ३७० मिटर ताःहाकःगु थ्व निगू सुरुङ मार्गय् स्टिल लाइनिङ ज्या सिधलधायेवं ९६ प्रतिशतया ल्याखय् ज्या सिधइगु खँ धाःगु दु । अथेहे थ्व आयोजनाया मत वितरणया निंतिं रामेछापया खिम्तीइ प्रशारण लाइन दयेकेगु ज्या नं युद्धस्तरं न्ह्यानाच्वंगु खँ धाःगु दु । कुल २१७ गू टावर मध्ये आःतक १३० गू टावर दयेकेधुंकूगु व मेथाय् नं फाउन्डेशनया ज्या जुयाच्वंगु खँ धाःगु दु ।

आयोजनां थ्वयां न्ह्यव हे कर्मचारी सञ्चय कोषया कर्मचारी व न्यागू लाखं मल्याक सञ्चयकर्तातय्त साधारण शेयर मीधुंकूगु दु ।