
येँ – थनया लगमय् च्वंगु भिमसेन थापाया दरवार सीलखाना थुनेगु ज्या न्ह्याःगु दु । छेँया कारणं यानाः लँजुवाःतय्त वये वनेत तकं ग्यानापुसें च्वंगुलिं छेँ थुनेगु ज्या न्ह्याकूगु खँ स्थानीय वडा ज्याकुथिं धाःगु दु । २१ वडाया वडाध्यक्ष उदयचुडामणि वज्राचार्यया कथं उगु छेँ गुगुं नं इलय् दुना वयेफइगु सम्भावना दुगुलिं आःयात जनताया सुरक्षाया निंतिं थुनेगु ज्या जुयाच्वंगु खँ ‘नेपालभाषा टाइम्स’ लिसे खँ ल्हायेगु झ्वलय् कनादीगु दु ।
उगु दरवारया कारणं मानवीय क्षति जुइफइगु खँ कनादिसें ‘थुनेधुंकाः छु यायेगु धइगु स्वयां नं आःयात खली जग्गा गथे दु अथे हे तयातयेगु खः’ धयादिल । छेँ पुरातात्विक महत्वया मजूगु खँ कनादिसें छेँ थुनेधुंकाः जग्गा खाली हे यानातयेगु खँ नं वय्कलं कनादीगु दु । ‘थ्व छेँ पुरातात्विक महत्वया मखु, छम्ह व्यक्तिया नामय् दयेकातःगु छेँ खः अथे जुयाः छेँ थुनेधुंकाः उगु थाय्यात खुल्ला याना तयेगु खः ।’
थ्वहे झ्वलय् मेयर विद्यासुन्दर शाक्यं धाःसा उगु थाय्यात क्यब दयेकेगु खँ कनादीगु दु । ‘नेपालभाषा टाइम्स’ लिसें खँ ल्हायेगु झ्वलय् वय्कलं उगु खँ धयादीगु खः । वय्कलं धयादी, ‘उगु खुल्ला थाय्यात क्यबय् रुपय् विकास यायेगु जुइ ।’ थ्व सम्बन्धय् पुरातत्व विभागया प्रवक्ता रामबहादुर कुँवरयात सम्पर्क तयेगु कुतः यानागु खःसा वय्कलं फोन ल्ह्वनामदी । उगु जग्गा ४ रोपनी दुगु जानकारी नं मेयर शाक्यं बियादीगु दु । थौंकन्हय् लगमय् क्यब दयेकेगु ज्या न्ह्यानाच्वंगु दु ।
LEAVE YOUR COMMENTS