केपी ओलीं माफी फ्वनेमाः

येँ – नेकपा एमालेया वरिष्ठ नेता माधव नेपालं पार्टी अध्यक्ष केपी शर्मा ओलीं थःपिंत न्ह्याक्व हे ब्वः बिउसां नं थःपिं पार्टी एकता जुइमा धइगु पक्षय् दुगु खँ कनादीगु दु । म्हिगः जूगु थःगु पक्षया केन्द्रीय दुजःतय् बैठकय् न्ववासें वय्कलं थःपिं दक्षिणपन्थी विचार विरुद्ध संघर्ष याना वयाच्वनाम्ह जूगुलिं उकिया निंतिं छप्पँ जुयाः न्ह्याः वनेमाःगु बिचाः तयादिल । वय्कलं धयादिल, ‘केपी ओलीं जितः न्ह्याक्व ब्वः बिउसां जि आः नं पार्टी एकता जुइमा धइगु पक्षय् दु, एकताया निंतिं जिगु कुतः जारी दु ।’

ओलीं थःत अलमले यायेत स्वया– च्वंगु जकं मखुला धइगु आशंका प्वंकुसें वय्कलं पार्टी एकताया निंतिं कुतः यायेमाःगु खँ धयादिल । म्हिगःया बैठकय् पार्टी एकताया नितिं सजगतापूर्वक न्ह्यायेमाःगु निर्णय याःगु खँ केन्द्रीय दुजः रघुजी पन्तं कनादीगु दु ।

उकथं हे बैठकय् पार्टी एकताया निंतिं ओली पुचःलिसे जूगु झिगू बुँदे सहमतिया बारे नं खँल्हाबल्हा जूगु खः । बैठकय् आपालं केन्द्रीय दुजःतय्सं छगू हे कथंया सुझाव बिउगु दु । उमिसं पार्टी एकता यायेगु खःसा सम्मानजनक एकता जुइमाः धासें तर ओली पुचःयात कयाः ब्वलनाच्वंगु आशंका अझ नं दनिगु सुझाव बिउगु खः । अध्यक्ष ओलीं आः नं थः यकःति बैठक सःताः थीथी गम्भीर द्वपं बियाच्वंगुलिं ओली अझ नं एकताया पक्षय् इमान्दार मदुगु खँ धाःगु दु ।

उकथं हे छुं छुं नेतातय्सं एकता वार्ताया नितिं ताः ई तक पीगु पाय्छि मजू धासें यदि एकता जुइगु सम्भावना मदुगु खःसा विद्रोह यानाः न्ह्यःने न्ह्याः वनेमाःगु सुझाव नं बिउगु दु । म्हिगः न्ववाःपिं केन्द्रीय दुजःतय्सं एकताया नामय् ओलीं थःपिंत अलमलय् यानाच्वंगु धासें प्रतिनिधिसभा विघटन विरुद्ध ओलीं माफी फ्वनेमाःगु खँ नं पिहां वःगु खः ।
पार्टी दुने आत्मसम्मान, सह अस्तित्व व सामुहिक भावनाया विकास मजूगुलिं समस्या ब्वलंगु खः धासें विवाद मिले यायेत न्ह्यचिलाच्वंपिं नेतातय्सं उकियात ध्यान बियाः न्ह्याः वनेमाःगु खँ नं बैठकय् पिहां वःगु खः ।

१० बुँदे सहमतिया विरोध
एमाले पार्टी एकताया लागिं केपी ओली पुचः व माधव नेपाल पुचःया दथुइ जूगु १० बुँदे सहमतियात आः नेपाल पुचलं विरोध याना हःगु दु । म्हिगः जूगु नेपाल पुचःया बैठकय् न्ववाःपिं आपालं नेतातय्सं थ्व १० बुँदे सहमतिया आधारय् पार्टी एकता याये मफइगु बिचाः तःगु खः ।

छुं नेतातय्सं धाःसा थ्वहे सहमतिया आधारय् पार्टी हे एकता यायेमाः धकाः खँ तःगु खः । पार्टी दुने १० बुँदे सहमतिया विरोध जूगुलिं ओली पुचःलिसे उगु सहमति याना वःपिं नेतात चिन्तित जूगु दु । पार्टी अध्यक्ष केपी ओलीं थ्व १० बुँदे सहमति जूगुयां कन्हय् कुन्हु हे माधव नेपाल लगायतया नेतातय्त लाक्वपाक्व ब्वः बिउगु कारणं नेपाल पुचलं नं १० बुँदे सहमति माने याये मफइगु खँ धयाहःगु खः ।

सम्बन्धित बुखँ

LEAVE YOUR COMMENTS