नेवाः एकता दिवस तःजिक हन

यल – नेवाः देय् दबूया संयोजनय् म्हिगः यलय् तःजिक नेवाः एकता दिवस हन । छगू जुलुस पिकयाःलि सभा यासें नेवाः एकता दिवस हंगु । नेवाः देय् दबूया संयोजनय् नेपालभाषा मंकाः खलः यल लिसें ज्यापु समाज यल व थीथी संघसंस्थाया मंकाः ग्वसालय् थ्व दिवस हंगु खः ।
यलया पूच्वय् मुनाः जुलस पिथंगु खःसा उगु जुलुस मंगःया हःखाय् थ्यंकाः सभाय् हिउगु खः ।

नेवाः देय् दबूया नायः नरेश ताम्राकारया सभापतित्वय् जूगु उगु ज्याझ्वलय् थीथी राजनीतिक पार्टीया नेवाः नेतातय्सं सम्बोधन यानादीगु खः ।ज्याझ्वलय् संघीय समाजवादी फोरमया सहअध्यक्ष राजेन्द्र श्रेष्ठ, नेकपाया केन्द्रीय दुजः दिलीप महर्जन व नेपाली कांग्रेसया तीर्थराम डंगोलपिंसं सम्बोधन यानादीगु खः ।

ज्याझ्वलय् ३ नम्बर प्रदेश सांसद राजकाजी महर्जन, लोककवि राजभाई जकःमि, सत्यनारायण डंगोल, किरण महर्जन, उमेश स्थापित, शाक्य सुरेन, ऋषिप्रसाद श्रेष्ठ, सुमन सायमि, असोज महर्जन आदिपिनिगु नं उपस्थिति दुगु खः ।

ज्याझ्वलय् वक्तातय्सं न्हूगु संविधान जारी जूसां नेवाःतय्त बी माःगु अधिकार आः तक नं मबिउगु खँय् चिउताः प्वंकुसें थौंकन्हय् विकासया नामय् जुयाच्वंगु सतक विस्तार, फास्ट ट्राय्क आदि निर्माणं नेवाःतय्त उमिगु आदिभूमिं विस्थापित यायेत्यंगु बारे नं कनेगु ज्या जूगु खः ।

सम्बन्धित बुखँ

LEAVE YOUR COMMENTS