संग्रह योग्य तस्वीर प्रकाशन यायेमाः
येँ – येँ महानगरपालिकाया प्रमुख विद्यासुुन्दर शाक्यं संग्रह याये योग्य तस्वीर प्रकाशन यायेमाःगु खँ धयादीगु दु । दक्वं वर्गया पाठक व दर्शकया निंतिं फोटो पत्रकारिता छगू सशक्त विधा खः धासें आखः ब्वने मसःपिंसं नं फोटो स्वयाः उकिं धायेत्यंगु खँ थुइके फइ धयादिल ।
महानगर प्रमुख शाक्यं छपाः किपातं द्वलंद्वः खँग्वःया भाय् व्यक्त यानाच्वंगु दइ धासें फोटो पत्रकारिताया थ्व विशेषता मेमेगु विधा स्वयां फरक जूगु व न्यनेगु क्षमता मदुपिंसं नं उकियात ग्रहण याये फइ धयादिल ।
महानगर प्रमुख शाक्यं उगु खँ राष्ट्रिय फोटो पत्रकार समूह, नेपाल (एनएफपीजे) या नीन्याक्वःगु वार्षिक साधारणसभा व झिंनिक्वःगु केन्द्रीय अधिवेशनय् मूपाहां थासं संबोधन यासें धयादीगु खः । वय्कलं येँ महानगरं थःगु थीथी प्रकाशनय् किपायात नं महत्व बिया वयाच्वंगु खँ न्ह्यथँसें फोटो पत्रकारतय्सं काःगु येँ देय्या मूर्त, अमूर्त संस्कृति, सम्पदा, सहरी व्यवस्थापन, सहरी सुन्दरताया किपा प्रकाशन यानाः सहकार्य यायेत थः तयार दु धयादिल ।
समूहया महासचिव रोशन पुरीं स्वनिगःया मानव निर्मित सम्पदा व देय्या थीथी थासय् दुगु प्राकृतिक सम्पदाया किपा बाखंया रुपय् विश्व बजारय् छ्वये फइ धासें उकिया निंतिं पहल यायेत इनाप यानादिल ।
ज्याझ्वलय् एनएफपीजे हरिगोपाल फोटो पत्रकारिता पुरस्कार ०७६ व ०७७ या निंतिं थीथी विधाय् फोटो पत्रकारतय्त सिरपाः नं लःल्हाःगु खः ।
सिरपाःकथं मनोरञ्जन विधाय् नवराज वाग्ले व कपिल खड्का, कासाय् सत्यम श्रेष्ठ व उज्वल डंगोल, पर्यटन विधाय् नारायण सिलवाल व प्रेम थापा, संस्कृति व सम्पदा विधाय् शोभा महर्जन व प्रदीप शाक्य, साहसिक विधाय् मुकुन्द कालीकोटे व पूर्णिमा श्रेष्ठयात दसिपौलिसें पदक लःल्हाःगु खः । अथे हे झिद्वः तका दांया माधव थापा जोखिमपूर्ण फोटो पत्रकारिता पुरस्कार सुशीलकुमार श्रेष्ठयात लःल्हाःगु ख ।
अधिवेशनं प्रदीपराज वन्तया अध्यक्षताय् झिंस्वम्हेसिया ज्यासना पुचः नं ल्यःगु खः । ज्यासना पुचलय् कृष्ण खड्का वरिष्ठ उपाध्यक्ष, भगवती थापा महिला उपाध्यक्ष, नवराज श्रेष्ठ महासचिव मुकुन्द कालीकोटे सचिव व सागर श्रेष्ठ कोषाध्यक्षय् च्वनादीगु दु ।
LEAVE YOUR COMMENTS