कानुन दयेकेत मन्त्रालय हथाय्चाल

येँ (नेपालभाषा टाइम्स)÷प्रदेशयात माःगु कानुन दयेकेत संघीय कानुन मन्त्रालयं संविधान कथं दयेके ल्यं दनिगु कानुनत याकनं याकनं दयेकेगु लागिं मन्त्रालयतय्त इनाप याःगु दु ।

कानुन मन्त्री धनराज गुरुङं म्हिगः थीथी मन्त्रालययात पौ छ्वसें सम्बन्धित मन्त्रालयतय्सं थःपिंलिसे सम्बन्ध्ति कानूनत दयेकेत मस्यौदा छ्वया हयेत इनाप याःगु खः । आः वइगु संसदीय अधिवेशनय् पेश याइगु विधेयकतय्गु धलः एकीकृत कथं तयार यानाः संघीय संसदया व्यवस्थापन विधिया ज्यायात न्ह्यःने न्ह्याकाः कानुन दयेकेगु प्रणालीया विकास यायेत आवश्यक जूगु खँ नं पतिइ धयादीगु दु ।

वंगु छवाः न्ह्यः न्हय्गुलिं प्रदेशया गृहमन्त्रीतय्सं प्रधानमन्त्रीयात नापलानाः प्रदेशया प्रहरी समायोजनाया नितिं आवश्यक कानुन दयेके माल धकाः दबाब बिउगु खः ।