करुणां भय् बिउगु म्येँचाःया म्युजिक भिडियो

किपू – इन्द्रेणी सांस्कृतिक समाज (इसास)या ग्वसालय् वंगु शनिवाः जूगु छगू ज्याझ्वःया दथुइ ‘करुणां भय् बिउगु’ नांया म्येँचाःया म्युजिक भिडियो पिदंगु दु । किपूया नांजाःम्ह जनपक्षीय म्येँ हालामि मीनाकुमारी महर्जनया सलय् दुथ्यानाच्वंगु म्येँचाःया म्युजिक भिडियो पिथंगु खः ।

इसासया नायः वीरप्रसाद भंसारीया सभापतित्वय् जूगु ज्याझ्वलय् मूपाहांकथं झायादीम्ह किपू नगरपालिकाया प्रमुख रमेश महर्जनं म्युजिक भिडियो सार्वजनिक यानादीगु खः । नगरप्रमुख महर्जनं म्येँ हालामि महर्जनया नामय् किपूया सांस्कृतिककःमिपिनिगु छगू सफू पिथनेगु बचं नं बियादीगु खः ।

वरिष्ठ संगीतज्ञ अमरराज शर्मा राजोपाध्याय व साहित्यकार, संचारकःमि मीना वज्राचार्यं पितब्वज्या जूगु म्युजिक भिडियोया म्येँया समीक्षा यानादीगु खः । ज्याझ्वलय् विशेष पाहांकथं झायादीम्ह प्रा. डा. चन्द्रमान वज्राचार्य, नेपालभाषाया म्युजिक भिडियोया न्हापांम्ह निर्देशक विजयरत्न असंबरें नं नुगःखँ तयादीगु ज्याझ्वः नांजाःम्ह म्येँ हालामि दीपा महर्जनं न्ह्याकादीगु खः ।

आपालं जनपक्षीय म्येँय् थःगु सः बियादीधुंकूम्ह म्येँ हालामि महर्जनया आपालं म्येँया म्युजिक भिडियो पिहां वयेधुंकूगु दुसा आः पितब्वज्या जूगु म्येँचालय् वय्कःया न्हय्पु म्येँ दुथ्यानाच्वंगु दु । म्युजिक भिडियोया म्येँ जनकवि दुर्गालाल श्रेष्ठ, कवि राजभाई जकःमि, चन्देश्वर महर्जन लगायतया म्येँ दुथ्यानाच्वंगु दु ।

सम्बन्धित बुखँ

LEAVE YOUR COMMENTS