बागमति प्रदेशया नीति तथा कार्यक्रम पारित

येँ – बागमति प्रदेश सरकाराया नीति तथा कार्यक्रम प्रदेशसभां पारित जूगु दु । बुधवाः च्वंगु प्रदेशसभाया मुँज्याय् प्रदेश प्रमुख विष्णुप्रसाद प्रसाई नं न्ह्यब्वयादीगु नीति तथा कार्यक्रम सर्वसम्मतं पारित याःगु खः । नीति तथा कार्यक्रमय् उत्पादनशीलय् क्षेत्रय् लागानी अप्येकेगु, स्वास्थ्य सेवायात प्रभावकारी दयेकेगु, कृषि क्षेत्रयात आधुनिकीकरण यायेगु ज्याझ्वः दुथ्याकतःगु दु ।

नीति तथा कार्यक्रमय् प्रदेश सांसदतय्सं ल्ह्वंगु न्ह्यसःया लिसः बियादिसें मुख्यमन्त्री डोरमणी पौडेलं नीति तथा कार्यक्रम लागू जुइगु विषयलय् शंका मयायेत इनाप यानादिल । वय्कलं सरकारं तत्कालीन, मध्यकालीन व दिर्घकालीन योजना कथं ज्या यायेगु कथं न्ह्याः वनाच्वंगु धयादिल ।

नीति तथा कार्यक्रमय् दुथ्याःगु मू मू विषय

कोरोना भाइरसा (कोभिड-१९)या महामारीयात मध्यनजरय् तया वइगु आर्थिक दँय् उत्पादनमुलक क्षेत्रय् लगानी अप्वयेकेगु नीति प्रदेश सरकारं काःगु दु । उत्पादनशील क्षेत्रय् लगानी अप्येका बैंकपाखें न्यून व्याजदरय् त्यसाः उपलब्ध याकेगु खँ नीति तथा कार्यक्रमय् न्ह्यथनातःगु दु ।

अथेहे प्रदेश दुने निःशुल्क आधारभूत स्वास्थ्य सेवायात प्रभावकारी दयेकेगु निंतिं स्वास्थ्य संस्थाय् जनशक्ति, उपकरण व वासः उपलब्धता सुनिश्चित याकेगु नीति दुथ्याकातःगु दु । स्वास्थ्य सेवायात थप सुदृढ यायेगु निंतिं ‘छगू माध्यमिक विद्यालय छम्ह नर्स’ ज्याझ्व संचान हयेगु तयारी प्रदेश सरकारं याःगु दु ।

स्वास्थ्य सेवा प्रभावकारी यायेगु कथं हटौंडा अस्पतालयात ३ सय शैयाया अस्पतालय् स्तरोन्नती यायेगु, ख्वप, सिन्धुली व क्रिशुली अस्पतालयात १ सय शैयाया विशिष्टिकृत अस्पताल दयेकेगु, धादिङ व चौतारा अस्पतालयात ५० व रसुवा व रामेछाप अस्पतालयात २५ शैयाया अस्पतालय् स्तरोन्नती याइगु जूगु दु ।

प्रदेश सरकारां कृषि, पशुपंक्षी व मत्स्य क्षेत्रया आधुनिकीकरण व औद्योगीकरण यानाः गुणस्तरीय उत्पादनय् बः बीगु नीति काःगु दु । सरकारं विदेशं लिहांवःपिं व देय् दुने दुपिं कृषि व पशुपंक्षी विषय अध्ययन यानाः बेरोजगार च्वनाच्वंपिं ल्याम्हतय्त कृषि पेशाय् आवद्ध यानाः उत्पादनय् सालाकायेगु निंतिं विशेष रोजगार ज्याझ्वः संचालन याइग जूगु दु ।

अथेहे सरकारां द्वन्द पीडितया साथ प्रदेश सरकार, उद्यमीया हात प्रदेश सरकारया साथ, बागमती प्रदेशया इच्छा छोरी बुहारीया उच्च शिक्षा, लगायतया ज्याझ्वः न्ह्याकीगु खँ नीति तथा कार्यक्रमय् दुथ्याकताःगु दु ।