मेलम्चीइ ल्हानाच्वंगु थःगु छेँ मामां च्वं वनेगु शुरु

मेलम्ची÷वंगु असार महिनाय् वःगु खुसिबालं डुबे जूगु थःपिनि छेँ मात्तुमालाः मेलम्ची बजाःया स्थानीय मनूत थःथःपिनि छेँय् च्वं वनेगु शुरु जूगु दु । सरकारपाखें छेँय् च्वं वने मिले मजूनि धाःसां नं स्थानीय मनूत थःपिंसं हे जोखिम फयाः छेँय् च्वं वंगु खः ।

उगु खुसिबालं आपालं फि व ल्वहंचा (ग्रेग्रान) चुइके हःगु खःसा अज्याःगु ग्रेग्रान बजाःया छेँय् छेँय् दुहां वंगु खः । उकी लानाः आपालं छेँया छतँजाः नितँजाः डुबे जूगु दुसा गुलि छेँ ला प्यतँजाः तक नं डुबे जूगु दु ।

आः सरकारपाखें डोजर हयाः छेँय् छेँय् दुहां वनाच्वंगु अज्याःगु ग्रेग्रान चीकेगु ज्या यानाच्वंगु दु । ग्रेग्रान चीकूलिसे अन डुबे जूगु छेँ लुया वयाच्वंगु दु । गुलिं छेँया ल्हानाच्वंगु छतँजाः नितँजाः नं खने दया वःगु दु । थःपिनि छेँ खने दया वयेवं स्थानीय मनूत छेँय् च्वं वनेगु शुरु याःगु खः ।

खुसिबालं अन २४७ खा छेँ चुइका हे यंकूगु खःसा मेगु आपालं छेँ मचुइकूसां चा व फिं ल्हाका बिउगु खः । थौंकन्हय् डोजरं चा व फि लिकयाः अज्याःगु छेँ लुइकेगु ज्या जुयाच्वंगु दु । तर छेँ लुया वःसां अन च्वने जिउ वा मजिउ धइगु परीक्षण धाःसा याःगु मदुनि । तर छेँ ल्हाःगुलिं टहराय् च्वनाच्वंपिं मनूत टहराय् च्वने थाकुल धासें धमाधम थःथःगु हे छेँय् च्वं वनेगु शुरु जूगु खः । सरकारं थ्व छेँय् च्वने मत्यनि धकाः पना तःगु दु । तर स्थानीय मनूतय्सं धाःसा चिकुला नं न्ह्यःने थ्यंकः वःगुलिं टहराय् च्वने थाकुल धकाः छिंसां मछिंसां थःगु हे छेँय् च्वं वनेगु शुरु याःगु खः ।

छेँ दुने नं सामानत फुक्क चा व फिं ल्हानाच्वंगु जुयाः थ्व चीकेत तकं तसकं थाकुगु खँ स्थानीय मनूतय्सं धाःगु दु । स्थानीय मनूतय्सं धाःकथं ग्रेग्रानं ल्हाकातःगु छेँ मालाः अन च्वने जीकेत तकं ५–६ लाख दां खर्च याये मालाच्वंगु दु । सरकारं अन च्वने मजिउनि धाःसां नं टहराय् सुकुम्बासी थें च्वंच्वनेगु पलेसा थःगु हे छेँय् च्वं वनेगु अःपुइ धकाः उपिं छेँय् सरे जुयाच्वंगु खः ।

मेलम्ची नगरपालिकाया मेयर डम्बरबहादुर अर्यालया कथं उगु खुसिबालं मेलम्ची बजाःया १७०० रोपनी बुँ चुइका यंकूगु खः । थ्व बुँया मू जक हे करिब ३ अर्ब तका तूगु खँ नं वय्कलं धयादीगु दु ।
मनूत थःथःगु छेँय् च्वं वंसां अन हानं अज्याःगु हे खुसिबाः वइगु खः लाकि धइगु ग्याःचिकु धाःसा अझं कायम दनि । मेलम्चीया च्वय् च्वय् च्वंगु पहाडय् वा मवःसां नं लेदो कुतुं वयेगु बन्द मजूनि । मेमेगु लँय् नं इलय् ब्यलय् अझं चलः वनाच्वंगु दु । छेँ लुया वःसां सकलें च्वं मवंगुलिं थाय् झिझां दनाच्वंगु दु । अन दनाच्वंगु गुलिखे छेँ बैंकय् तयाः ध्यबा त्याय् कयातःगु खँ नं सीदुगु दु । –रासस