लिपि स्यनीगु ट्युटोरियल भिडियो व नेपालभाषा डिक्सनरी एप सार्वजनिक

येँ (नेपालभाषा टाइम्स)- नेपाल लिपि व रञ्जना लिपि च्वयेगु स्यनीगु ट्युटोरियल भिडियो व नेपालभाषा डिक्सनरी एप पिदंगु दु । नेपाल लिपि गुथि व दबुली नेपाःया मंकाः कुतलं दयेकूगु थ्व ट्युटोरियलं नेपाल लिपि व रञ्जना लिपिया स्वर वर्ण व व्यञ्जन वर्ण गुकथं च्वयेगु धयागु अःपुक स्यनाबी । थुगु ट्युटोरियललिसें सार्वजनिक जूगु नेपालभाषा डिक्सनरी एप्सं नेपालभाषाया खँग्वःया अर्थ थुइकेगु लिसें नेपालभाषा सयेकेत नं ग्वाहालि याइगु खँ धाःगु दु ।

येँ महानगरपालिकाया ग्वाहालिं दयेकूगु थुगु भिडियो व एप बिहिवाः छगू ज्याझ्वःया दथुइ येँ महानगरपालिकाया उपमेयर सुनिता डंगोल, नेपालभाषा एकेदेमिया भाइस चान्सलर मल्ल के सुन्दर, भाषा आयोगया दुजः सुरेश मानन्धर व नेपालभाषा केन्द्रीय विभागया प्रमुख सह प्रा. डा. राजनलाल जोशीं पितब्वज्या यानादीगु खः । डिक्सनरीइ न्हापांखुसी ‘लुखा’ खँग्वः सर्च यानाः डिक्सनरीया लुखा चायेकादीम्ह उपमेयर डंगोलं नेपालभाषा व लिपि सयेकेगु निंतिं थुपिं एपं ग्वाहालि याइगु विश्वास प्वंकादिल । थौंकन्हय्या युग प्रविधिया युग जूगुलिं भाषा लिपि संरक्षणया निंतिं प्रविधीमैत्री जुइमाःगु आवश्यक तायेकाः येँ महानगरपालिकां ऐप दयेकेत ग्वाहालि यानागु खँ वय्कलं धयादिल ।

ज्याझ्वलय् न्ववानादिसें नेपालभाषा एकेदेमिया भाइस चान्सलर मल्ल के सुन्दरं नेवाः भाय्, लिपि, संस्कृति संरक्षणया ज्याय् थौंकन्हय् प्रविधियात छ्यलाः ल्याय्म्ह पुस्ता न्ह्यज्यावःगु खँय् लसता प्वंकादिल । वय्कलं धयादीगु दु, ‘भाय्, लिपि संरक्षणया ज्याय् थुकथं ल्याय्म्ह पुस्ता न्ह्यज्याःगु वःगु खनाः तसकं लय्ताः । थौंकन्हय्या ल्याय्म्हत प्रविधि छ्यलाः भाय् लिपि, संस्कृति संरक्षणय् वयाच्वंगु खनाबलय् जितः आः झीगु भाय्, संस्कृति सुनां ल्यंकातइ, सुनां संरक्षण याइ धयागु चिन्ता मंत ।’

अथेहे ज्याझ्वलय् न्ववानादिसें आइटी विज्ञ एलेन वैलोचन तुलाधरं एप दयेकेधुंकाः थुकियात छ्यलाबुलाय् हयेगु दायित्व आः झीगु समाजयाके वःगु खँ धयादिल । ‘एप दयेकां जक मजिउ, उकिया छ्यलाबुला नं जुइमाः । छ्यलाबुला मजुल धाःसा छुं नं कथंया एपया औचित्य दइमखु, उकिं थुकिया छ्यलाबुला व्यापक यायेगु दायित्व झीके वःगु दु । उकिं सकसिनं थ्व एपयात शेयर यानाः भाइरल यायेमाः’ वय्कलं धयादीगु दु ।

नेपालभाषा डिक्सनरी एप्सया प्रोजेक्ट प्रमुख सुभाषराम प्रजापतिं भिडियो सन्देशमार्फत एप्सयाबारे जानकारी बियादीगु खः । वय्कःया कथं थुगु एप्सय् देवनागरी, रोमन व नेपाल लिपि छ्यलाः नेपालभाषाया खँग्वः सर्च यायेफइसा थुकी खँग्वःया अर्थलिसें उगु खँग्वःलिसे सम्बन्धी किपा नं दुगु खँ धयादिल । ज्याझ्वलय् थुगु डिक्सनरीइ पीछद्वलं अप्वः खँग्वः दुथ्याःगु व द्वाल्खा भाय्या खँग्वःत नं दुथ्याःगु जानकारी बिउगु खः । थुगु एप एन्ड्रोइड व ओएस निगुलिसनं चले जुइ ।

नेपाल लिपि गुथिया ४४ दँ बुन्हिया लसताय् लाकाः थुगु एप पितब्वज्या जूगु खः । ज्याझ्वलय् सभापतिया थासं न्ववासें गुथिया अध्यक्ष अनिल स्थापितं लिपि गुथिं याना वयाच्वंगु ज्याया जानकारी बिसें अझ प्रविधिमैत्री जुयाः न्ह्याः वनेगु निंतिं गुथिं योजना दयेकाच्वंगु खँ कनादिल ।