‘नेपाःया न्हूगु नक्साया प्रमाण लुइकूम्ह पद्मरत्न खः’
येँ (नेपालभाषा टाइम्स) – सरकारं छुं ई न्ह्यः लिम्पियाधुरा, लिपुलेक व कालापानी क्षेत्र दुथ्याकाः नेपाःया न्हूगु नक्सा सार्वजनिक यात । सरकारं नक्साय् दुथ्याःगु थ्व क्षेत्र नेपाःया हे खः धकाः दावी यायेगु प्रशस्त प्रमाण थःपिंके दु धकाः दावी यात । अज्याःगु प्रमाण मुंकेगु ज्या सुनां याःगु खः धइगु खँ धाःसा सरकारं सार्वजनिक मयाः । तर अज्याःगु प्रमाणत मुंकेगु ज्या नेवाः न्ह्यलुवा भाजु पद्मरत्न तुलाधरं यानादीगु खँ सीदुगु दु ।
नागरिक समाजया न्ह्यलुवा नापं वाम बुद्धिजीवी श्याम श्रेष्ठं लिम्पियाधुरा, लिपुलेक व कालापानी क्षेत्रत नेपाःया खः धकाः प्रमाण लुइकूम्ह हे पद्मरत्न तुलाधर खः धकाः दावी यानादीगु दु । २०५५ सालय् महाकाली सन्धी जूगु इलय् पद्मरत्नया हे नेतृत्वय् सीमा अतिक्रमण प्रतिरोध समिति नीस्वंगु व काली नदीया सिमानाया प्रमाण वहे समितिं लुइकूगु खँ श्रेष्ठं धयादीगु दु ।
भाजु पद्मरत्न तुलाधरया लुमन्तिइ येँय् जूगु छगू ज्याझ्वलय् न्ववासें वय् कलं धयादिल, ‘काली नदीया सिमाना छुटे जूसा जक महत्वपूर्ण खँ जुइ धकाः उगु समितिं प्रमाण मालेत निगू समिति नीस्वंगु खः । छगू ऐतिहासिक तथ्य खोजबिन समिति व मेगु नक्सा खोजबिन समिति ।’
नक्सा खोजबिन समितिया नेतृत्व पद्मरत्न स्वयमं यानादीगु खःसा उकिया लागिं लण्डनय् दुगु नक्सा, सुगौलि सन्धी निसेंया नक्सा, तत्कालीन मुख्य सचिव जे. एडाम्सं काली नदीया सिमाना दुथ्याकाः च्वःगु पौ कलकत्ता पुस्तकालयं कायेगु निसें बैतडी मालपोतय् अनयापिं स्थानीय जनतां कर पुलातःगु भ्वं लुइकेगु ज्या याःगु खँ नं श्रेष्ठं कनादिल ।
‘पद्मदाइया नेतृत्वय् मालेज्या जूगु प्रमाण हे लिपा कृष्णप्रसाद भट्टराई प्रधानमन्त्री जूगु इलय् झीसं सरकारयात लःल्हानागु खः,’ वय्कलं धयादिल, ‘सरकारं व बाहेक मेगु छुं नं प्रमाण आः तक लुइकूगु मदुनि ।’
भारतं कालापानी समेत थःगु भूभाग दुने दुथ्याकाः न्हूगु नक्सा जारी यायेवं नेपालं नं उकियात लिसः बी कथं कालापानी थःगु भूभाग दुने दुथ्याकाः न्हूगु नक्सा जारी याःगु खः । थ्वहे मुद्दां यानाः लिपांगु इलय् नेपाः-भारत स्वापू समेत प्रभावित जूवंगु खः ।
LEAVE YOUR COMMENTS