न्हूसतकय् पेटीया अध्ययन याइगु, मेयरं हानं धोका बिल धाःसा स्थिति ग्यानापुइगु ख्याच्वः
येँ (नेपालभाषा टाइम्स)÷न्हूसतक लागाय् फुटपाथ तब्या यायेगु विवाद आःयात समाधान जूगु दु । अथे नं आः थ्व विवादय् बिउगु बचं पूमवंकल धाःसा भविषयय् अझ ग्यानापुक ल्वापु जुइ फइगु खँ धाःगु दु ।
म्हिगः मेयर बालेन साह, उपमेयर सुनिता डंगोल, प्रमुख प्रशासकीय अधिकृत प्रदिप परियार, १५ वडाया अध्यक्ष ईश्वरमान सिंह डंगोल, १७ वडाया नविन मानन्धर व ३२ वडाया नवराज पराजुली लगायत थीथी वडाया वडा अध्यक्षतय् दथुइ छगू सहमति यानाः आःयात आन्दोलन लित कायेगु व २४ वडाय् ज्या याके बीगु सहमति जूगु खः ।
२२ वडाया अध्यक्ष चिनीकाजी महर्जनया धापू कथं मेमेगु नं वडाया जनप्रतिनिधिपिं समेत जानाः आन्दोलन याःगु कारणं बालेन साह भचा लिचिउगु खः । आः सहमति कथं धोका बीत स्वत धाःसा हानं मनू क्वकाये मालीगु खँ वय्कलं कनादिल । आन्दोलनय् वयेमाःगु जुयाः वय्कलं २२ वडाया ज्याकू हे स्वन्हु तक सतकय् तये हःगु खः ।
न्हूसतकय् आः वइगु मंसिर २ गते तक छुं नं कथंया फुटपाथ विस्तार मयायेगु सहमति जूगु खँ २३ वडाया वडा अध्यक्ष मचाराजा महर्जनं कनादिल । आः फुटपाथ विस्तार बारे छगू पुचः दयेकाः अध्ययन यायेगु व उकिं गज्याःगु लिच्वः बी, उकियात पालना यानाः न्ह्याः वनेगु खँ नं वय्कलं कनादिल । म्हिगः जूगु सहमति कथं अध्ययन रिपोर्टया आधारय् वडा नं. २२ व २३ फुटपाथ बारे निर्णय याइ ।
वय्कःया कथं अध्ययन समितिया नेतृत्व सहरी मनपा योजना आयोगया उपाध्यक्ष सुमन राजभण्डारीं यानादी । वडा नम्बर २२, २३ व २४ या वडाध्यक्ष दुजः जुइसा २२ पाखें निम्ह व २३÷२४ पाखें छम्ह छम्ह विषय विज्ञ दुजः बीगु सहमति जूगु दु ।
LEAVE YOUR COMMENTS