लुटेरातय् मिखा विदेशं वइपिंके

येँ – विदेशय् ज्या याः वनाच्वंपिं नेपाःमित मोहनि न्यायेकेत छेँय् वःबलय् लँय् हे लुटे जुइगु घटनात जुयाच्वंगु दु । नखःचखःया इलय् जुइगु लुटपाट म्हो यायेत प्रहरीं निगरानी अप्वयेकागु दु धाःसां थ्वहे इलय् विदेशं वइपिं नेपाःमितय्त लुटे यायेगु क्रम अप्वया वःगु खँ धाःगु दु ।
खास यानाः विदेशं वयाः थःथःगु जिल्ला लिहां वनीबलय् उमित बसपार्क लागा व मेगु सुनसान लागाय् नशालु पदार्थ नकाः लुटे याइगु क्रम अप्वयाच्वंगु खँ धाःगु दु ।

आः नकतिनि कोरियां लिहां वःपिं दांगया रामबहादुर सिंह व साउदी अरेबियां लिहां वःम्ह पाँचथरया अमृत बहादुर साम्बाहाम्फेयात नेपाःमितय्सं हे लुटे याःगु खः । उपिं मोहनि नखः न्यायेकेत छेँय् वयाच्वंपिं खः । विदेशं लिहां वइपिं नेपाःमितय्के यक्व ध्यबा दइगु लिसें उमिसं थिकेगु मोबाइल व लुँ समेत ज्वना वइगु जुयाःत उमित लुटेरातय्सं विशेष रुपं निशाना दयेकीगु खँ धाःगु दु ।

नाइट बसं वनीपिं वा चान्हय् बस पार्कय् थ्यनीपिं अज्याःपिं नेपाःमितय्त लँय् हे लुटे याइगु घटना लिपांगु इलय् अप्वया वःगु दु । थज्याःगु घटनायात पनेगु लागिं आः प्रहरीं थुखेपाखे विशेष निगरानी अप्वयेके माःगु खँय् नं पीडिततय्सं सः तया हःगु दु ।