ने. सं. ११४४ कौलाथ्व पारू - नःलास्वनेगु

हरिसिद्धि द्यःया १२ दँयामू प्याकेगु व देय् भ्वय् क्वचाल

यल- देय्या ऐतहासिक, धार्मिक व सांस्कृतिक महत्वं जाःगु जल (हरिसिद्धि) द्यःया झिंनिदँया जात्रा अन्तर्गत वंगु शुक्रवाः मू प्याकेगु जात्रा जुल । हरिसिद्धि त्रिशक्ति भवानीया झिंनिदँया मू प्याकेगु अन्तर्गत वंगु शुक्रवाः हरिसिद्धि भवानी देगःया न्ह्यःने न्हिछियंकं द्यःगंछिं थीथी प्याखं न्ह्यब्वयेगु ज्या जूगु खः ।

हरिसिद्धि द्यःया झिंनिदँय् छक्वः जुइगु पुनःस्थापना, शक्ति संचय, सिद्धि दनेगु ज्याझ्वः वंगु गुंलागा पारीनिसें न्ह्याःगु खः । थ्व हे झ्वलय् झिंनिदँय् छक्वः जुइगु थुकथंया ज्याझ्वःया झ्वलय् दिवंगत जूपिं पुजारीया थासय् न्हूपिं दुकायेगु, तालिम बीगु, जलद्यःया गंप्याखंया ख्वाःपाः हिलेगु, ल्ह्वनेगु, लँपुं छायेगु, न्हूगु वसः सुइकेगु, ख्वाःपाः मपुंसे स्वां तपुलिं पुयाः प्याखं हुलेगु, न्हू कलश थापं यायेगु देय् भ्वय् नकेगु आदि थीथी विधि पूवंकेगु ज्या जुइधुंकूगु दु ।

थ्व हे थीथी विविविधान दथुइ वंगु शुक्रवाः छगू महत्वपूर्णगु ज्याखँकथं मूप्याकेगु जात्रा जूगु खः । मूप्याकेगु जात्रा अन्तर्गत सुथ न्हापां चिपं थिकेगु धुंकाः शुरु जूगु प्याखं बहनि लिबाकतक न्ह्याःगु खः । जलद्यःया देगलं द्यःगंछिं पिहां वयेधुंकाः न्ह्यःने च्वंगु नासः दबुलिइ मंकाःकथं प्याखं क्यनाः देगलय् लिहां वंगु खः । थुगु जात्रा झिंनिदँय् दकलय् न्हापां जुइगु जात्रा खः । थ्व जलमित सकसिगुं सहभागिताय् याइगु जात्रा खः ।