‘वामपन्थीया जक सरकार वइ मखु’

येँ (नेपालभाषा टाइम्स)÷नेकपा (एस) या अध्यक्ष माधव नेपालं आः प्रचार जुयाच्वं थें वामपन्थीया जक सरकार दयेकेगु खँय् सत्यता मदुगु खँ धयादीगु दु । वय्कलं आःया गठबन्धनं हे मेगु सरकार नं गठन याइगु दावी यानादीगु दु । पार्टीया निर्वाचित सांसदतय्त भिंतुना बीत ग्वसाः ग्वःगु ज्याझ्वलय् न्ववासें वय्कलं उगु खँ धयादीगु खः ।

वंगु चुनावय् न्हूगु शक्ति नं वःगु धासें वय्कलं संसदय् सुयां बहुमत मदुगुलिं थज्याःगु अवस्थाय् गज्याःगु सरकार गठन जुइ धइगु चिउताः ब्वलनाच्वंगु खँ कनादिल । वय्कलं धयादिल, ‘गुलिसिनं गैर वामपन्थी सरकारया खँ ल्हानाच्वंगु दुसा गुलिसिनं वामपन्थीया जक सरकार दयेकेगु खँ ल्हानाच्वंगु दु । तर थ्व खँय् विश्वास मदु, सत्यता मदु, जिमिसं गठबन्धनया हे सरकार दयेकेगु जुइ ।’

उकथं हे अध्यक्ष नेपालं गठबन्धन दुने दुगु विश्वासया वातावरणयात स्यंकाः घर न घाटया अवस्थाय् वनीगु लँपुइ थःपिं मवनेगु खँ नं धयादीगु दु । आः नं गठबन्धनया हे सरकार दयेकेगु खँय् थः विश्वस्त दु धासें वय्कलं धयादिल, ‘चुनाव त्याना वयेधुंकाः गठबन्धनय् दुपिं मेगु दलतय्के अहंकार अप्वल धाःसा छुं नं कथंया पलाः ल्ह्वनेत नं जिपिं तयार दु । गज्याःगु स्थिति वइ अज्याःगु स्थितिया सामान यायेत जिपिं तयार दु ।’

उकथं हे वय्कलं गठबन्धनया सरकार दयेकेत थम्हं कुतः यानाच्वनागु खँ नं धयादिल ।