जटिल इलय् छुं मजूम्ह देवदास मानन्धर सरल इलय् मंत

येँ (नेपालभाषा टाइम्स)- नेपालभाषा आन्दोलनया सक्रिय कार्यकर्ता लिसें नांजाःम्ह समाजसेवी देवदास मानन्धर म्हीग बहनी आकाझाकां मंत । वय्कः मदुगु खबरं भाषाख्यः स्तब्ध जूगु दु ।

भाजु मानन्धर थनिं निदँ न्ह्यः आकाझाकां ब्रेन ह्यामरेज जुयाः शारीरिक रुपं अशक्त जुयादीगु खः । अबले जटिल अवस्थाय् थ्यनेधुंकूम्ह वय्कः छेँजः, चिकित्सक व नमक केयर सेन्टरया सुसाःकुसाःपाखें उसाँय् बांलाना वःगु खः ।

म्हुतुं खँ ल्हाये मफुसां मनू म्हसीके फइगु अवस्था थ्यंगुलिं वय्कःयात पासाभाइपिंसं नापलानाः खँ ब्याकेगु ज्या नं जूगु खः । वय्कःयात स्वन्ति लिपा छेँय् हे हयाः सुसाःकुसाः यायेगु बिचाः छेँजःपिंसं यानातःगु खः । आः वइगु लक्ष्मीपुजा कुन्हु बहनी वय्कःया थँहितिइ च्वंगु छेँय् भाषाह्यमिपिं मुनाः वय्कःलिसे तुच्चा यायेगु ज्याझ्वः नापं तयातःगु खः । तर म्हीग बहनी १० बजेपाखे नमन केयर सेन्टरय् हे आकाझाकां वय्कः मंत । तसकं जटिल अवस्थाय् नं स्वास्थ्यलाभ जुयाः ‘आः लनीगु जुल’ धकाः आशा ब्वलना वयाच्वंगु इलय् वय्कः मदुगु खबर न्यनाः सकलें स्तब्ध जूगु दु ।

७० दँ दुम्ह मानन्धर नांजाःम्ह भाषासेवी लिसें उद्योगपति लक्ष्मीदास मानन्धरया काय खः । थीथी संस्थाय् आवद्ध जुयादीम्ह वय्कलं नेपाल संवत्या व्यवस्थित क्यालेण्डर पिकायेगु, मांभासं ब्वंकेगु, नेपाल लिपियात युनिकोडय् तयेगु ज्याय् थःगु योगदान यानादीगु खः । वय्कःया जहान लिसें छम्ह काय व निम्ह म्ह्याय् दी । बुधवाः वय्कःया अन्त्येष्टि याइगु ग्वसाः दु ।