सफू सहकारीया साहित्यिक लय् मुँज्या

येँ – नेपालभाषा सफू सहकारी संस्थाया ग्वसालय् लय्पतिकं जुया वयाच्वंगु विविध साहित्य लय् मुँज्या वंगु शुक्रवाः च्वसापासाय् जुल । ज्याझ्वलय् प्रा. डा. तुयूबहादुर महर्जनं झीगु भाषाय् ब्याकरण, व्यक्ति कोष, कृति कोष, भौगोलिक कोष व ऐतिहासिक कोष थेंज्याःगु कोषत मदुगुलिं अज्याःगु कोषत तयार याना वनेमाःगु खँय् बः बियादिसें भाषाप्रति अनुराग दुपिंसं माया यानाच्वंतलय् सलंसः दँ तकं थ्व भाषा साहित्य तनीमखु धयादिल ।

ज्याझ्वःया मूपाहां मथुरा साय्मिं चिबाखं न्यंकाः उकिया नां तयेत इनाप यासें सही शीर्षकयात सिरपाः बीगु घोषणा यानादिल । ज्याझ्वलय् किरण साय्मि, सौरभ शाक्य, शकुन्तला महर्जन, शरद कसाः, धु्रव मधिकःमि, राज साय्मि, बुद्ध नेवाः, बाबुकाजी सुवाल, बसन्त नकःमि, नरेन्द्रमान महर्जन, कृष्णभक्त बोडे लगायत नीम्ह साहित्यकःमितय्सं थः थःगु च्वसु ब्वना न्यंकादीगु खः । ज्याझ्वः सफू सहकारीया नायः हरिप्रसाद श्रेष्ठया सभापतित्वय् जूगु खः ।