सतक विस्तार कि भ्रष्टाचारया लँपु ?

येँ – जनताया छेँ थुनाः जूसां सतक तब्या यायेगु काठमाडौं उपत्यका विकास प्राधिकरणया प्रमुख भाइकाजी तिवारीया खास उद्देश्य शहरी विकास स्वयां नं सतक निर्माणया नामय् भ्रष्टाचार यायेगु जक जुयाच्वंगु खँ पत्ता लगे जूगु दु । महालेखा परीक्षण कार्यालयं छुं न्हि न्ह्यः सार्वजनिक याःगु प्रतिवेदनय् काठमाडौं उपत्यका विकास प्राधिकरणं स्वनिगःया थीथी थासय् सतक दयेकागु धकाः याःगु खर्चय् भ्रष्टाचार जूगु आशंका याःगु दु ।

प्राधिकरणं स्वनिगःया थीथी थासय् १५ किलोमिटर सतक दयेकागु धकाः १९ करोड तका खर्च यानागु ल्याःचाः क्यनातःगु दु । अले थ्व ज्या शतप्रतिशत हे सम्पन्न जूगु धकाः नं रिपोर्ट बियातःगु दु । थ्व ज्याया लागिं बजेट धाःसा ७७ करोड ५१ लाख तका फ्यानातःगु दु । ध्यबा खर्च जूगु ल्याखं थ्व ज्या केवल २४.२४ प्रतिशत जक सिधःगु खनेदु ।

तर शतप्रतिशत हे सिधल धाःगुलिं बाँकी ध्यबा गन वन ले धइगु न्ह्यसः पिहां वःगु दु ।उकिं महालेखा परीक्षकं थ्व विवरण यथार्थपरक मजुल धासें थुकिया बारे छानबिन हे याये माली धकाः सरकारयात सुझाव बियातःगु दु ।अझ दकलय् रोचक खँ ला छु खनेदु धाःसां लँ दयेकेगु धइगु जक एजेण्डा तयाः २३ न्हु तक च्वंगु बैठक वापत ४० लाख भत्ता इना तःगु दु ।

थ्व लँ दयेकेगु धाःगु गनयागु खः तकं गनं च्वया तःगु मदु । बैठकय् ब्वति काः वःपिं निगू वडाया पदाधिकारीतय्त भत्ता वापत धकाः ४० लाख तका बियागु खँ उल्लेख यानातःगु दु । एजेण्डा मदयेक बैठक च्वने दइ मखु धकाः अर्थ मन्त्रालयं दयेका तःगु निर्देशिका तकं प्राधिकरणं पालना मयाःगु खँ प्रतिवेदनय् न्ह्यथनातःगु दु ।