येँ १९ वडाया अध्यक्ष शशिलाल श्रेष्ठ मंत

 

येँ महानगरपालिका वडा नं. १९ या वडा अध्यक्ष शशिलाल श्रेष्ठ मंत । नसा कुहां वनीगु नलीइ क्यान्सर जुयाच्वंम्ह श्रेष्ठ थौं थनया नर्भिक अस्पतालय् वासः याकुयाकुं मदुगु खः । वय्कः ६५ दँ दुम्ह खः ।

थौं सुथय् आकाझाकां बान्ता जुयाः वय्कःयात नर्भिक अस्पताल यंकूगु खः । न्हिनय् १ बजे तक वय्कःया अवस्था बांलानाच्वंगु खःसा २ बजेपाखे भचा मछिंसे च्वनेवं वय्कलं हे आइसीयुलय् तये माली थेंच्वं धयादीगुलिं वय्कःयात आइसीयुलय् तयाः वासः याकूगु खः ।

वय्कःयात वासः यानादीम्ह डा. राजेन्द्र बरालं कनादीकथं वासः यानाच्वंगु इलय् हे आकाझाकां वय्कःयाके सुगर अप्वया वंगु लिसें चि व हि म्हो जुया वंगु खःसा वयां लिपा छथुं हे थीथी कथंया समस्या ब्वलनाः वय्कः मदुगु खः । वडा अध्यक्ष श्रेष्ठयाके वंगु छुं ई न्ह्यः तिनि क्यान्सर जुयाच्वंगु
खने दुगु खः । उकिया वासः याकेत वय्कः भारतया दिल्ली वनेगु नं खँ जुयाच्वंगु खःसां चिकित्सकतय् सल्लाह कथं वय्कलं नेपालय् हे वासः
याकादीगु खः ।

मदुम्ह भाजु श्रेष्ठ येँ मनपा १९ वडाया अतिकं लोकंह्वाःम्ह स्थानीय नेता खः । वय्कः वि.सं. २०४३ सालय् वडा सदस्य कथं निर्वाचित जुयादीगु
खःसा वयां लिपा वि.सं. २०४९, २०५४ व २०७३ सालया स्थानीय निर्वाचनय् वय्कः नेपाली कांग्रेसया उम्मेदवार कथं वडा अध्यक्षय् निर्वाचित जुयादीगु खः ।

येँ महानगरपालिकाया मेयर विद्यासुन्दर शाक्यं वडा अध्यक्ष श्रेष्ठ मदयाः नगर विकासया ज्याय् दत्तचित्त जुयाः ज्या यानादीम्ह छम्ह सहयात्री मंत
धासें दुःख प्वंकादीगु दु । अथे हे उपप्रमुख हरिप्रभा खड्गी श्रेष्ठं नं वय्कः मदुगु दुःखय् शोक प्वंकादीगु दु ।

मदुम्ह श्रेष्ठया जहान लिसें स्वम्ह म्ह्याय् व छम्ह काय दी । कन्हय् वय्कःया अन्त्येष्टि याइगु ग्वसाः दु । कन्हय् वय्कःया सीम्हयात वडा ज्याकुथी तयाः अन्तिम श्रद्धांजलि बीगु व वयां लिपा पशुपति आर्यघाटय् अन्त्येष्टि याइगु खँ धाःगु दु । वय्कः मदुगु दुःखय् कन्हय् छन्हु येँ महानगरपालिकाया ज्याकू बिदा जुइगु खँ प्रमुख कार्यकारी अधिकृत राजेश्वर ज्ञवालीं कनादीगु दु ।

सम्बन्धित बुखँ

LEAVE YOUR COMMENTS