राष्ट्र संघया मूज्याकूथिइ नं स्वांयाःपुन्हिया विशेष ज्याझ्वः

येँ – संयुक्त राष्ट्र संघया मूज्याकूथिइ नं स्वांयाःपुन्हिया लसताय् विशेष ज्याझ्वः जुल । राष्ट्र संघया मूज्याकुथिइ विशेष संस्मरणात्मक ज्याझ्वः यासें स्वांयाःपुन्हिया लसताय् ज्याझ्वः जूगु खः ।

बैशाख दिवसया रुपय् तकं कयातःगु स्वांयाःपुन्हिया लसताय् वंगु मंगलवाः जूगु विशेष ज्याझ्वलय् राष्ट्र संघया महासचिव एन्टोनियो गुइटरेस, महासभाया अध्यक्षलिसें नेपाः, भुटान, बंगलादेश, भारत, इन्डोनेसिया, नर्वे, पाकिस्तान, गणतन्त्र कोरिया, जापान, हंगेरी, कम्बोडिया, फिलिपिन्स, रुस, मलेसिया, म्यान्मा, लाओस, मंगोलिया, भियतनाम, सिंगापुर, श्रीलंका, थाइल्याण्ड लगायतया देय्या प्रतिनिधिं शान्ति व बुद्ध दर्शनया औचित्ययात कयाः प्रवचन बियादीगु खः ।

राष्ट्र संघया निंतिं स्थायी नेपाली नियोगया कथं नेपाःया कार्यवाहक स्थायी प्रतिनिधि निर्मलराज काफ्लें बुद्ध शिक्षां करुणा, अहिंसा, क्षमा व सहनशीलता थेंज्याःगु सद्गणया शिक्षा स्यनेगु ज्या याःगु धयादिल । ज्याझ्वलय् सांस्कृति सम्पदा संरक्षण यायेत नेपाल सरकारं बुद्ध जन्मस्थल लुम्बिनी क्षेत्रया विकासया निंतिं गुरुयोजनाया तर्जुमा यानाच्वंगु जानकारी वय्कलं बियादीगु खः । उगु इलय् वय्कलं बुद्ध जन्मस्थल लुम्बिनीया भ्रमण यायेत ज्याझ्वलय् उपस्थित थीथी देय्या प्रतिनिधिपिं सकसितं इनाप नं यानादीगु खः ।