कारय् सीम्ह तयाहःगु लुल

ख्वप – ख्वपय् गाडी दुने शंकास्पद अवस्थाय् सीम्ह तयाहःगु लूगु दु । सूर्यविनायक नगरपालिका–८ सिपाडेलय् च्वंम्ह निकेश भुजुया सीम्ह ख्वपया ब्रम्हायणीइ बा. ५ च ६४२१ नम्बरया मारुती गाडीइ तयाहःगु लूगु खँ प्रहरीं धाःगु दु । शनिवाः सुथय् ९ बजे प्यदँ दुम्ह कायलिसें गाडी दयेकेत छेँनं पिहां वंम्ह निकेश बहनी ६ बजे तक नं सम्पर्कय् मवयेवं कलाःम्ह सिर्जनां महानगरीय प्रहरी वृत्त जगातीइ खबर याःगु खः ।

निकेशयात मालेगु झ्वलय् गाडी सहित छुं मनूत ख्वप नगरपालिका–८ लिवालीपाखे वंगु खँ सीवं प्रहरीं उमिगु पीछा याःगु खः । लिवालीइ हे प्रहरीं गाडीयात पनेत स्वःगु खःसा उपिं ब्रम्हायणीइ थ्यंकाः गाडी व निकेशया काययात त्वःताः बिसिउँ वंगु खः । अनंलि प्रहरीं निकेशयात अनं तुं ख्वप अस्पताल यंकूगु खःसा अन डाक्टरं निकेश सीधुंकूगु जानकारी बिउगु खः ।

प्रारम्भिक अनुसन्धान लिपा प्रहरीं घटना शंकास्पद जूगु धासें प्यम्हेसित ज्वंगु दु । प्रहरीं ख्वपया सुमन बाला, दाङया भुपबहादुर रोका, सिन्धुपाल्चोकया किरण श्रेष्ठ व चाँगुनारायण ताथलीया सुकु धइम्ह राज बनमालायात ज्वंगु खः । सीम्हेस्यां अत्यधिक लागू वासः नयातःगु खने दुसां रिकेशनाप दुपिं मनूत बिसिउँ वंगुलिं धाःसा घटना शंकास्पद जूगु प्रहरीं धाःगु दु ।

सम्बन्धित बुखँ

LEAVE YOUR COMMENTS