न्हूदँ ११४४ हनेत तयारी न्ह्यात

येँ (नेपालभाषा टाइम्स)- थ्वहे वइगु कछलाथ्व पारु (कार्तिक २८ गते) नेपाल संवत् ११४४ न्हूदँ तःजिक हनेगु नितिं नेपाल संवत् न्हूदँ राष्ट्रिय समारोह समिति ११४४ पाखें थीथी कथंया तयारी यानाच्वंगु दु ।

समारोह समितिया सचिवालयं बिउगु जानकारी कथं न्हूदँ तःजिक हनेगु नितिं थीथी उपसमिति नीस्वंगु दु । न्हूदँया निंतिं प्रचारप्रसार, सांस्कृतिक बाजं, आर्थिक, मिसा परिचालन, स्वयंसेवक, ¥याली ब्यवस्थापन, मञ्च व्यवस्थापन, न्हिल्याःपौ पिथना, नासः पुजा व प्रसाद ग्रहण व्यवस्थापन, संघसंस्था सम्पर्क समन्वय, सुरक्षा निकाय व ट्राफिक समन्वय व्यवस्थापन, देय्न्यंकं न्हूदँ समारोह समन्वय, शंखधर दिवस ज्याझ्वःया उपसमिति नीस्वंगु दु । अथेहे, समारोह समितिं न्हूदँ तःजिक हनेगु नितिं थीथी भेला, मुँज्यात नं न्ह्याकूगु दु ।

न्हूदँ समारोह समितिं थुगु दँनिसें न्हूदँया नायः निदँया नितिं ज्या सनेत क्वःछिउगु कथं ११४४ न्हूदँ समारोह समितिया नायः प्रा.डा. नरेशमान बज्राचार्ययात सर्वसम्मतिं ल्यःगु खः ।