नेपाल संवत् शुरु जूगु न्हि गुज्वःगु ?

ख्वपया ज्योतिषं तयार यात नेपाल संवत् शुरु जूगु न्हिया लग्न कुण्डली

येँ – देशवासीयात त्यासां मुक्त यानाः थनिं ११४१ दँ न्ह्यः नेपाल संवत शुरु जूगु खः । नेपाल संवत् शुरु जूगु उगु दिं धइगु नेवाः संस्कृतिया ल्याखं महत्वपूर्णगु दिं म्हपुजा खः । नेपाल संवत्यात राष्ट्रिय संवत्या रुपय् राज्यं नाला कायेधुंकूगु अले नेपाल संवत्या प्रवर्तक शंखधर साख्वाःयात राष्ट्रिय विभूति घोषणा यायेधुंकूगु अवस्थाय् नेपाल संवत शुरु जूगु दिंया बारे मनूतय्के ब्वलंगु उत्सुकतायात ध्यानय् तयाः ख्वपया तलेजुनाप स्वापू दुम्ह दैवज्ञ ज्योतिष कृष्णराज जोशीं उगु न्हिया लग्न कुण्डली पिकयादीगु दु ।

नेपाल संवत् शुरु जूगु दिं छु राशी, छु नक्षत्र, छु योग अले गुलि तक भिंगु दिं खः धकाः थुइकेगु कथं वय्कलं उगु लग्न कुण्डली तयार यानादीगु खः । ताः ई तक यानादीगु अध्ययन अले निरन्तरया कुतः लिपा ज्योतिष भाजु जोशीं नेपाल संवत शुरु जूगु दिंया लग्न कुण्डली तयार यानादीगु दु । ज्योतिष भाजु जोशीं तयार यानादीगु कुण्डली कथं नेपाल संवत शुरु जूगु दिं विक्रम संवत् ९३६ कार्तिक २४ गते सोमवाः खः । अथे हे इस्वी सन् ८७९ अक्टोबर २४ तारिख खः । नक्षत्र विशाखा, करणे नाग, योग शैभाग्य, राशी तुला खःसा लग्न सूर्य, चन्द्र, राहु शुक्र शिरय् लानाच्वंगु, बुद्ध व वृहस्पति धनय् लानाच्वंगु, शनिश्चर केतु स्पतम स्थान अथे धइगु शिरय् लानाच्वंगु खःसा मंगल द्वादश स्थान अथे धइगु पालीइ लानाच्वंगु दिं खः ।

अथे हे शुक्रया राशी तुला जूगुलिं शुक्र थःगु हे छेँय् लानाच्वंगु नापं कुलदिपक योग, पञ्चमा पुरुष योग जुयाच्वंगुलिं ततःधंगु कीर्ति तइगु अले लिपा कालान्तरय् वनाः जक फल दइगु दिन जुयाच्वंगु खः । उगु लग्न कुण्डलीइ ब्याख्या यानातःकथं चन्द्रमा, बृहस्पति शुक्र अर्थात अष्ट सूर्यया लिउने लानाच्वंगु धइगु विपरित राज योग खः । राज्यपाखें मखु जनतापाखें लोकंह्वाइगु अले शनिश्चर बक्र अथे धइगु शनिश्चर लिउनेपाखे चाःहिलावनीगु ई जूगुलिं शासक वर्ग सिबें नं सेवक वर्गया उत्थान व प्रगति जुइगु ई लानाच्वंगु खः ।

थुगु दिंया तिथि स्वल धाःसा सुथय् १० बजेजुयाः ३४ मिनेट लिपा जक पारु क्यंगु खनेदु। अबलय् शंखधर साख्वाः, सिद्धिवन्त जोशी नापं अबलय्या जुजुपिं जानाः आमै कुन्हु सहलह ब्याकाः म्हपुजा याइगु दिं तसकं बांलाःगु दिं धकाः नालाः पारुया दिनय् नेपाल संवत् शुरु यानादीगु खयेमाः धकाः ज्योतिष कृष्णराज जोशीं कनादीगु दु । वय्कलं तसकं मेहेनत यानाः पिकयादीगु नेपाल संवत शुरु जूगु दिंया थुगु लग्न कुण्डलीं यानाः नेपाल संवत, शंखधर साख्वाः नापं उगु ईया बारे अध्ययन अन्वेषण याइपिंत तसकं ग्वाहालि जुइगु खँ धाःगु दु ।