पुन्हि कुन्हु नं दशअवतार मक्यन, व्यवस्थापन दथुइ हे ल्वापु (भिडियो स्वयादिसँ)

येँ – येँयाःया झ्वलय् वसन्तपुली क्यनीगु दशअवतार येँयाः पुन्हिु कुन्हु नं मक्यन । दशअवतार क्यनेत कलाकारत तयार जुयाच्वने धुंकूसां व्यवस्थापन पाखें बेवास्ता यायेवं कलाकारत दशअवतार मक्यंसे लिहां वंगु खः ।

दशअवतार क्यने मफुगु कारण दशअवतार गुथिया नायः दिपक श्रेष्ठया हे कारणं खः धकाः कलाकारतय्सं धाःगु दु । अध्यक्ष श्रेष्ठ इन्द्रजात्रा व्यवस्थापन समितिया नं उपाध्यक्ष खः । येँयाः जात्राया निंतिं नेपाल सरकार व येँ महानगरपालिकापाखें वइगु ध्यबा दशअवतार गुथियात नं बीगु याना वयाच्वंगु दु । थ्व पालय् नं अध्यक्ष श्रेष्ठं इन्द्रजात्रा व्यवस्थापन समिति मार्फत वःगु ध्यबा थःम्हं कयाः दशअवतार क्यनेगु निंतिं खर्च मबिउगुलिं कलाकारत दशअवतार मक्यंसे लिहां वंगु खः ।

दशअवतार क्यनेगु निंतिं निर्देशन याना वयाच्वनादीम्ह राजन शाहीं थुगुसी दशअवतारया निंतिं व्यवस्थापन समितिमाफर्त छगू लाख तका वःगु, तर नायः श्रेष्ठं झिद्वः दां नगद व स्वीद्वः दांया चेक बियाः मेगु ध्यबा थःम्हं हे काःगु द्वपं बियादीगु दु । स्वीद्वःया चेक नं बिदाबलय् बिउगुलिं उगु चेक नं हिले मखंनिगु खँ वय्कलं धयादीगु दु । कलाकारतय्त नये–त्वनेगु निंतिं तक ध्यबा मवःगुलिं थःपिंसं दशअवतार क्यनेगु हे बन्द यायेमाःगु खँ वय्कलं धयादीगु दु ।

थौं थःनेयाःया झ्वलय् कलाकारतय्सं क्वःनेयाःकुन्हु राष्ट्रपतियात तकं दशअवतार छाय् क्यनेमखंगु धयागु बारे माइक हे तयाः सार्वजनिक रुपं जानकारी बीगु तयारी याःगु खःसां अध्यक्ष श्रेष्ठं माइकया तार लिकयाः न्ववाये तकं मबिउगु खः । नायः श्रेष्ठं दशअवतारया निंतिं वःगु ध्यबा उकिया निंतिं छाय् खर्च मजूगु धयागु बारे धाःसा छुं न्ववानादीगु मदुनि ।

नायः श्रेष्ठं दशअवतार क्यनेगु निंतिं वसः व हलंज्वलंत तक नं लाक्वपाक्व कथंया न्याना हयाच्वंगु खँ धाःगु दु । दशअवतार क्यनेगु निंतिं हयातःगु वसः, ख्वाःपाः, हलंज्वलं फुक्क हे भारतीय नाटकय् क्यनीगु ज्वलंत जुयाच्वंगु व छुं नं सामान नेवाः पह मवःगु खँ नं धाःगु दु ।