स्वसःम्ह उदाय ज्याथजिथियात हना

येँ(नेपालभाषा टाइम्स)-उदाय समाजं न्हापांखुसी थःगु समाज दुनेया झण्डै स्वसःम्ह ज्याथजिथियात हंगु दु । समाजं वंगु शनिवाः थनया नयाँबजारय् च्वंगु मल्टि भेन्युइ थःगु समुदाय दुनेया २९० म्ह ज्याथजिथियात हनेज्या याःगु खः । समाजया दुनेया थीथी गुंगू कवःया ज्याथजिथियात हनेज्या याःगु खः ।

समाजया ज्याथःपिं सकसितं नेवाः परम्पराकथं बेतालिं चिकाः व जिथिपिं सकसितं छ्यनय् ह्याउँ स्वां छुकाः हनेज्या याःगु ज्याझ्वलय् समाजया नायः डा. रुपज्योति कसाःलिसें प्रमोदमान सिंह बनिया, शान्तमुनि ताम्राकार, डा. ज्ञानेन्द्ररत्न तुलाधर लगायतया ज्यासना पुचःया दुजःपिंसं बेतालिं चिकादीगु खःसा समाजया मिसा पुचःया दुजः रत्नकमल कंसाकार लगायत पुचलं जिथिपिंत ह्याउँस्वां छुकादीगु खः ।

समाजया नायः डा. रुपज्योति कसां लसकुसलिसें विपश्यना ध्यानया महत्वया बारे नुगःखँ तयादिसें न्ह्याःगु ज्याझ्वलय् ज्याथःजिथिपिं सकसितं नेवाः परम्पराकथं ख्यें सगं बियाः हनेज्या याःगु खः । समाजया नायः कसाःलिसें मूछ्याञ्जे रजनी ताम्राकार, छ्याञ्जे दिव्यरत्न स्थापित लगायतं ज्याथःजिथिपिंत हनापौ देछानादीगु खः ।

८१ दँनिसें ९९ दँ दुपिं समाजया कवः दुनेया असं व न्यतया तुलाधर, केलत्वाःया कसाः, यतखाया सिन्दुराकार, मरु व महाबूया ताम्राकार, इतुंबहाः बनिया, वलाछि प्यंगःथांया सेलालिक, कुसुमबियालाछिया शिलाकार, भिंद्यः त्वाः, मखं, लगं, थाय्मदुया स्थापित समुदायया ज्याथजिथिपिंत हनेज्या याःगु खः ।