
येँ (नेपालभाषा टाइम्स)÷ आइसिसी टी–२० विश्वकप २०२४ एसिया छनोट सोमवाः निसे शुरु जुइगु जूगु दु । येँया टियू क्रिकेट मैदान व मुलपानी क्रिकेट मैदानय् कात्र्तिक १३ निसें कार्तिक १९ गते तक जुइगु छनोट कासाय् नेपाः सहित च्यागू टिमं ब्वति कयाच्वंगु दु । च्यागू टिमयात निगू पुचः दयेकाः तःगु दुसा पुचःया निगू शीर्ष टिम सेमिफाइनलय् थ्यनी ।
फाइनलय् थ्यंगू निगू टिम सन् २०२४ य् वेस्ट इन्डिज व अमेरिकाय् जुइगु टी–२० विश्वकप २०२४ या निंतिं छनोट जुइ । पुचः ‘ए’य् लाःगु नेपाःया पुचलय् सिंगापुर, ओमान व मलेसिया दु । अथेहे पुचः ‘बी’ इ युएइ, बहराइन, हङकङ व कुवेत दु । आइसिसी टी–२० छनोट म्हितीगु नेपाःया टिमया घोषणा जुइधुंकूगु दु । टिमय् स्पिनर सन्दीप लामिछाने नं लिहां वःगु दु । लामिछानें छनोट कासा जुइ न्ह्यः जूगु त्रिदेशीय सिरिज मम्हितूगु खः । सिरिजया समूह चरणया प्यंगुलिं कासा त्याकूगु नेपाः फाइनलय् युएइलिसे बूगु खः ।
आइसिसी टी–२० विश्वकप २०२४ एसिया छनोट न्ह्य आइतवाः जूगु पत्रकार सम्मेलनय् नेपाःया कप्तान रोहित पौडेलं छनोट कासा त्याकाः विश्वकपय् थाय् दयेकेगु थःपिनिगु लक्ष्य जूगु धाःगु दु । नेपाःया प्रशिक्षक मोन्टी देशाईं विपक्षीयात कमजोर मतायेकेगु व थःपिनीगु कमजोरीयात सुधार यायेगु खँ धाःगु खः । छनोटया न्हापांगु कासा नेपालं सोमवाः म्हिती । सोमवाः नेपालं सिंगापुरलिसे टियू मैदानय् सुथसिया ९ ताः इलय् न्हापांगु कासा म्हितीगु ज्याझ्वः दु । अथेहे नेपाःया निगूगु कासा कात्र्तिक १४ गते मंगलवाः मलेसिया व स्वंगूगु कासा कात्र्तिक १६ गते बिहिवाः ओमानलिसे जुइ ।
LEAVE YOUR COMMENTS