
येँ – बंगलादेशय् सुरु जूगु एसिसी इमर्जिङ टिम्स एशिया कप क्रिकेट धेंधेंबल्लाखय् भारतं नेपाःयात न्हय्गू विकेटं बुकूगु खः । नेपालं न्हापां ब्याटिङ यानाः १९३ रन दयेकूगु खःसा भारतं थ्व लक्ष्य ४२ ओभरय् स्वंगू विकेटया क्षतिइ पूवंकेवं नेपालं पराजय फयेमाःगु खः । नेपाःया निंतिं पवन सर्राफ व शरद भेषवाकरं छसिकथं ५६ रन व ४४ रन दयेकेवं नेपालं ४४.५ ओभरय् दक्वं विकेटया क्षतिइ १९३ रन दयेकूगु खः ।
थ्व धेंधेंबल्लाखय् पुलांम्ह कप्तान पारस खड्का व चर्चित बलर सन्दीप लामिछानें धाःसा मम्हितू । पारसं कप्तानी त्वःतेवं नेपाःया नेतृत्व यानाच्वंम्ह ज्ञानेन्द्र मल्ल धाःसा न्हापांगु ओभरय् आउट जुइवं भेषवाकरं कुशल भुर्तेललिसे ५४ रनया साझेदारी खः । साझेदारीया झ्वलय् भेषवाकरं ७६ बलय् ४४ रन दयेककूगु खः ।
भूर्तेलं धाःसा मुक्कं २८ रन दयेकलसा उपकप्तान दीपेन्द्र सिंह ऐरीं २४ व करण केसीं २० रन दयेकूगु खः ।भारतया निंतिं रवि सरथ व आर्यन जुयलं ७४ रनया साझेदारी याःगु खः । थ्व झ्वलय् सरथं ४९ रन दयेकलसा जुयलं २९ रन दयेकल । थ्व धुंकाः सनवीर सिंहं ५६ व अरमान जाफरं अविजित ५१ रन दयेकल ।
नेपाःपाखें सुसन भारती, ललितनारायण राजवंशी व करणं केसीं छगू छगू विकेट काःगु खः । भारतया निंतिं तेज बलर सौरभ दुबें २६ रन बियाः प्यंगू विकेट काःगु खः । दुबें कप्तान मल्ल लिसें सर्राफ, कामी व राजवंशीया विकेट काःगु खः । अथेहे यश राठोरं स्वंगू व पार्थ रेखाडें निगू विकेट काल ।
नेपालं थौं हंगकंग लिसे म्हिती । नेपाल, हंगकंग व ओमानया राष्ट्रिय टोली, भारत, पाकिस्तान, श्रीलंका, अफगानिस्तान व बंगलादेशया यु २३या कासामित म्हिताच्वंगु थ्व धेंधेंबल्लाःया म्हिगः हे जूगु मेगु कासाय् बंगलादेश व पाकिस्तान नं त्याःगु दु ।
LEAVE YOUR COMMENTS