किपूया स्ववासी समस्या ज्यंकेत पौ

किपू(नेपालभाषा टाइम्स)- किपूया माओवादी नगर कमिटीं नगर दुनेया स्वबासी, निस्सा मदुगु छेँबुँया समस्या ज्यंकेत प्रधानमन्त्री पुष्पकमल दाहालया ध्यानाकर्षण याःगु दु ।

म्हिगः प्रधानमन्त्री दाहालयात खुगू बुँदाया निवेदन बिसें किपू नगरया विद्यमान समस्या ज्यंकेत ध्यानाकर्षण याकूगु खः । समितिया अध्यक्ष दिलबहादुर महर्जनं हस्ताक्षर यानातःगु उगु ध्यानाकर्षण पतिइ मालपोत ऐन, २०३४ या उपदफा ७ या उपदफा (१) (क) पाखें बिउगु अधिकार छ्यलाः स्थानीय न्ह्यलुवातय् नेतृत्वय् सर्वाधिकार सम्पन्न समस्या समाधान समिति सरकारं दयेके फइगु व अज्याःगु समितिं किपू नगर दुने दुगु स्वबासी व निस्सा मदुगु छेँबुँया दर्ता सम्बन्धी समस्यायात वैज्ञानिक रुपं ज्यंके फइगु खँ न्ह्यथनातःगु दु ।

उकथं हे निवेदनय् वि.सं २०६१ सालय् स्थानीय सामाजिक अभियन्ता हरिशरण महर्जनया अध्यक्षताय् सरकारं समस्या समाधान समिति नीस्वनाः ज्या न्ह्याकूगु व उगु समितिं अबलये २५०० गू छेँबुँ दर्ता यानाः समस्या समाधान जूगु खँ नं लुमंकातःगु दु ।