खाद्य गुणस्तरया ज्या तत्काल न्ह्याकेत निर्देशन

येँ(नेपालभाषा टाइम्स)- येँ महानगर पालिकाया उप्रमुख सुनिता डंगोलं दुरु व त्वनेगु लः थेंज्याःगु खाद्यवस्तुया गुणस्तर कायम यायेत तत्काल ज्या न्ह्याकेत निर्देशन बियादीगु दु । उपप्रमुख डंगोलं खुल्ला व अनौपचारिक रुपं विक्री वितरण जुइगु दुरु व लःया स्वच्छता व गुणस्तर कायम यायेत तत्काल नाले फइगु उपाय अवलम्बन यानाः ज्या न्ह्याकेत निर्देशन बियादीगु खः ।

बजार व्यवस्थापन तथा उपभोक्ता हित संरक्षण समितिया वंगु आइतवाः च्वंगु बैठकय् उपप्रमुख डंगोलं उकथंया निर्देशन बियादीगु खः । बैठकं अनुगमनपाखें प्राप्त अवस्था बारे जानकारी कयादीगु खःसा वयां लिपा वय्कलं उकथंया निर्देशन बियादीगु खः । बजाःपाखें संकलन यानाहःगु नमूना परीक्षणया निंतिं महानगर थम्हं हे प्रयोगशाला स्थापना व संचालनया निंतिं तत्काल ज्या न्ह्याकेत धासें कृषि तथा पशुपंछि विभागया अधिकारीतय्त निर्देशन बियादीगु खः ।

थ्व हे भदौ १० गतेतक याःगु अनुगमनया झ्वलय् ज्वःगु, ह्याकिं वनाच्वंगु, झ्वाँय् झ्वाँय् कियातःगु २८ गः जार व जायेकातःगु छगः जार जफत याःगु खः । परीक्षणया निंतिं लः जायेकातःगु खुगः जार संकलन याःगु खः ।

बैठकय् उपप्रमुख डंगोलं थःपिनिगु चाहना धइगु स्वच्छ नसाज्वलंया उत्पादन, ढुवानी, संचय, विक्री प्रणाली खः धासें थ्व प्रणालीइ किसाननिसें उत्पादित ज्वलं व्यापार याइपिं सकसिगुं लाभ जुइकथंया व्यवस्था मिले यायेमाःगु खँय् ध्यान बीत इनाप यानादीगु दु ।

बैठकय् १८ वडाअध्यक्ष न्हुछेकाजी महर्जनं स्वच्छ लःया विषययात कयाः सरकारं वितरण याइगु लःया गुणस्तररय् नागरिकयात विश्वस्त याये फुसा बजारं न्यानाः लः त्वना च्वने मालीमखु धयादिल । अज्याःगु इलय् बजारय् दइगु लःया नियमन यायेत नं अःपुइगु वय्कःया धापू दु ।

२० वडाअध्यक्ष राजेन्द्र मानन्धरं दुरुया विषययात कयाः थःगु धारणा तयादीगु खः । वय्कलं प्याकेट यानातःगु दुरु किराना पसलं नं मीगु यानाच्वंगु जक मखसे सुथ न्हापां द्यः तुयु मजुनिवं सतकय् तकं मियाच्वंगु दइ, थज्याःगु दुरु करया दायरा दुने दु कि मदु धइगु जिज्ञासा तयादिल ।
महानगरया छगू तथ्यांककथं येँय् करिब ७० प्रतिशत दुरु खुल्ला रुपं मीगु यानाच्वंगु व करिब ख्वीन्यागू कम्पनीं जारय् लःया व्यापार यानाच्वंगु दु ।

सम्बन्धित बुखँ

LEAVE YOUR COMMENTS