येँयाः हनेत समिति, नेवाः भ्वय् नकीगु
येँ(नेपालभाषा टाइम्स)÷येँ महानगरपालिकां येँयाः नखः हनेत मूल समारोह समिति नीस्वंगु दु । येँ महानरपालिकां येँयाः (इन्द्रजात्रा) मूल समारोह समिति–११४४ नीस्वंगु खः । महानगरं नीस्वंगु समितिया जिम्मेवारी सम्पदा तथा पर्यटन समितियात बिउगु दु ।
येँ महानगर प्रमुख बालेन्द्र शाह (बालेन) या अध्यक्षताय् येँयाः जात्रा संचालन व व्यवस्थापन विषयय् च्वंगु बैठकं येँयाः जात्रा मूल समारोह समिति–११४४ गठन यायेगु निर्णय याःगु खः । येँ महानगर सम्पदा तथा पर्यटन समितिया संयोजक ८ वडाअध्यक्ष आशामान संगतया संयोजकत्वय् नीस्वंगु समितिइ दुजलय् सम्पदा तथा पर्यटन समितिया दुजःपिं च्वनादीगु दुसा सम्पदा विभागया प्रमुख कुमारी राई सदस्य सचिवय् च्वनादीगु दु ।
समितिया संयोजक संगतं स्थानीयं सदियौं न्ह्यवनिसें संचालन याना वयाच्वंगु जात्रायात ग्वाहालि यायेगु समितिया मुख्य उद्देश्य जुइगु जानकारी बियादीगु दु । लिसें थुगुसी येँयाःकुन्हु स्वनिगःया थीथी नगरपालिकाया प्रमुख व उपप्रमुखलिसें थीथी कासाय् नांजाःपिं कासामि, कला ख्यःया कलाकारलिसें विशिष्ट व्यक्तित्वपिंत नेवाः भ्वय्या निंतिं ब्वनेगु नं जानकारी बियादीगु दु । जात्रा संचालनलिसे सम्बन्धित निकाय, गुथि, खलः, संघसंस्थालिसे समन्वय यानाः थनया मौलिक जात्रा परम्परायात निरन्तरता बीगु निंति. समितिं विशेष ध्यान बीगु संयोजक संगतं कनादीगु दु ।
अथे हे जात्राया समन्वय व व्यस्थापनया निंतिं आवश्यककथं अतिथि सत्कार, सुरक्षा व्यवस्थापन, संचार तथा प्रचार प्रसार, सांस्कृतिक कार्यक्रम आदि उपसमिति नं गठन याःगु दु । वइगु यंलाथ्व दुतियाकुन्हु हनुमानध्वाखां नालास्थित यःसिं गुँइ यःसिं काः वनेगुलिसें येँयाः औपचारिक ज्याझ्वः शुरु जुइ । यःसिंगुं हःगु यःसिं भोताहिति तये हइगु व कायास्तमिकुन्हु हनुमानध्वाखाय् यंकाः यंलाथ्व द्वादशिकुन्हु यःसिं थनेवं येँयाः विधिवत रुपं न्ह्याइ ।
LEAVE YOUR COMMENTS