उत्तर कोरिया स्थायी रुपं क्षेप्यास्त्र परीक्षण केन्द्र बन्द यायेत सहमत

उत्तर कोरिया स्थायी रुपं क्षेप्यास्त्र परीक्षण केन्द्र बन्द यायेत सहमत जूगु खँ धाःगु दु । प्योङयाङया भ्रमणय् वनाच्वंम्ह दक्षिण कोरियाली राष्ट्रपति मून जे इनं उत्तर कोरियाया स्वतन्त्र निरीक्षकतय् सुपरीवेक्षणय् स्थायी रुपं क्षेप्यास्त्र परीक्षण केन्द्र बन्द यायेत सहमत जूगु खँ धयादीगु दु ।

प्योङयाङ निम्ह कोरियाली नेतातय् दथुइ जूगु शिखर वार्ताय् परमाणु अस्त्र निशस्त्रीकरणया लँय् न्ह्याः वनेगु सहमति जूगु खँ मूनं धयादीगु दु । उत्तर कोरियाली नेता किम जङ अनं थ्व सहमति कोरियाली प्रायद्वीपय शान्तिया निंतिं महत्वपूर्ण जूगु खँ धयादीगु दु । किमं थः याकनं हे दक्षिण कोरियाया राजधानी सोलया भ्रमणय् वनेगु खँ नं धयादीगु दु ।

किम यदि सोल वन धाःसा व दक्षिण कोरियाया भ्रमण याःम्ह न्हापांम्ह उत्तर कोरियाली नेता जुइ । मूनं उत्तर कोरियाली नेतायात सोल भ्रमणया ब्वनापौ बीधुंकूगु दु । थ्व भ्रमण थ्व हे दँया अन्तपाखे जुइगु अनुमान यानातःगु दु ।

निगू कोरिया दथुइ याकनं हे रेलमार्ग स्वायेगु, कोरियाली युद्ध लिपा छुटे जुयाः च्वनेमाःपिं छेँजःपिनि पुनर्मिलन याकेगु व स्वास्थ्य क्षेत्रय् ग्वाहालि यायेगु योजना दयेकाच्वंगु दु । अथेहे निगू कोरिया जानाः सन् २०३२ या ओलम्पिक ग्वसाः ग्वयेगु बिचाः नं यानाच्वंगु दु ।