लुमन्ति दबूया न्हूधाः
यल (नेपालभाषा टाइम्स)- नेपालभाषा केन्द्रीय विभागया ब्वमिपिनिगु ‘लुमन्ति दबू’या झिंछक्वःगु ज्यासना पुचःया पदस्थापन जूगु दु । थ्व हे ज्याझ्वलय् शैक्षिक सत्र २०७६÷७७ दँया नेपालभाषा एम.ए. ब्वँमिपिंत बिदाइ नापं मोहनी, स्वन्ति व न्हूदँ ११४४ या लसताय् भिन्तुना कालबिल ज्याझ्वः नं जुल ।
ज्याझ्वलय् ब्वमि जेष्ठ नागरिक श्रीकृष्ण महर्जनपाखें सिन्हः तिकाः निवर्तमान नायः अनिल स्थापितपाखें कोखाबियाः न्हू ज्यासना पुचःयात लसकुस याःगु खःसा मूपाहां कथं झायादीम्ह नेपालभाषा केन्द्रीय विभागया प्रमुख सह प्राध्यापक डा. राजनलाल जोशीं शैक्षिक सत्र २०७६।७७ या ब्वमिपिंत लुमन्ति चिं लःल्हानादीगु खः । भिंतुना बीगु झ्वलय् वय्कलं लुमन्ति दबूपाखें निरन्तर रुपं ज्याझ्वः न्ह्याकाः वने फयेमा नापं भाषा साहित्य ख्यलय् नं सृजनशील जुयाः न्ह्याः वनेफयेमा धकाः मनंतुंसे थज्याःगु ज्याय् विभागं माःकथं ग्वाहालि यायेगु बचं नं बियादिल ।
लुमन्ति दबूया दांभरी संगिता महर्जनं लसकुस यानाः न्ह्याःगु ज्याझ्वलय् निगूगु सेमेष्टरपाखें देवानन्द महर्जन, प्यंगूगु सेमेष्टरपाखें श्रीकृष्ण महर्जन, एम.फिल.या ब्वमिपाखें दानदास श्रेष्ठं थःथःगु भिंतुना न्वचु तयादीगु खः । ज्याझ्वः ताःलाकेत ग्वाहाली यानादीपिं सकसितं दबूया न्वकू सकुन्तला महर्जनं सुभाय् देछाःगु खःसा ज्याझ्वः लुमन्ति दबूया छ्याञ्जे पञ्चलाल महर्जनं न्ह्याकादीगु खः ।
न्हूगु ज्यासना पुचलय् नायः– रामेश्वर श्रेष्ठ ‘ह्याउँनिभाः’, न्वकू सकुन्तला महर्जन, छ्याञ्जे– पञ्चलाल महर्जन, दांभरी–संगीता महर्जन च्वनादीगु दुसा मू दुजलय् प्रकाश प्रधान, सुदिप महर्जन, हसना महर्जन, पुण्यकुमारी शाक्य, एलिना शाक्य, रमिना शाक्य व राजेन्द्रकुमार महर्जन च्वनादीगु दु ।
LEAVE YOUR COMMENTS