अमेरिकी जनसंख्याय् नेवाः !

येँ -न्हूगु जनसंख्या काइबलय् आः नेपालय् जक मखु अमेरिकाय् नं नेवाःया उपस्थिति क्यनेगु लागिं अभियान शुरु जूगु दु । सन् २०२० यात अमेरिकाय् जनसंख्या कायेगु वर्षया रुपय् कायेगु याइ । थुकिया लागिं अनलाइनपाखें थःगु नां दर्ता यायेगु ज्या न्ह्यानाच्वंगु दु ।

अमेरिकाय् च्वंपिं नेवाः अभियन्तातय्सं थ्व जनसंख्या काइगु ज्याय् नेवाः जातिया नां उल्लेख यायेत सकल नेवाःतय्त आह्वान याःगु दु । अनलाइन भरे यायेगु उगु फारामय् प्रश्न नं. ९ लय् न्यनातःगु न्ह्यसःया लिसः च्वयेबलय् थःगु देशया नां च्वयेगु मखु कि थःगु जातिया नां च्वयेत आह्वान याःगु दु ।

व्यक्तिया राष्ट्रियता बारे न्यना तःगु उगु न्ह्यसःया लिसलय् अप्वःसिनं देशया नां च्वयेफुगु जुयाः अन देशया नां तयेगु मखु कि जातिया नां तयेत इनाप याःगु खः ।

‘कन्ट्री छु ?’ धकाः न्यंगु जूसा

देशया नां तयेगु खः तर ‘नेशनालिटी वा इथनिसिटी छु ?’ धकाः न्यनातःगुली देश मखु जातिया नां च्वयेमाःगु खँ नं अभियन्तातय्सं धाःगु दु । थुकी जातिया नां उल्लेख याये फत धाःसा अमेरिकाय् वैध रुपं च्वनाच्वंपिं नेवाःतय् जनसंख्या नं स्पष्ट जुइगु खँ धाःगु दु । अमेरिकाय् च्वनाच्वंपिं कुल नेपाःमितय् संख्याय् नेवाःतय् ल्याः नं उल्लेख्य दु ।
अमेरिकाय् च्वनाच्वंपिं नेपाःमित मध्ये आपालं वैध रुपं च्वनाच्वंगु दुसा गुलिखे अवैध रुपं नं च्वनाच्वंगु दु । अन राष्ट्रपतिया रुपय् डोनाल्ड ट्रम्प निर्वाचित जुयाः वयेधुंकाः पिने देशं वइपिनि सम्बन्धय् कडा कानून हःगुलिं आः अवैध रुपं अमेरिकाय् च्वनेगु थाकुया वःगु खँ धायेगु याः । अवैधतय्त पितिनेगु ज्या याना हःगु दु ।