‘सम्पदा स्यंकाः शपिङ कम्प्लेक्स दयेके बी मखु’
येँ – असनय् च्वंगु कोथुननी स्यंकाः व्यापारिक कम्प्लेक्स दयेकेत गुथि संस्थानं यानाच्वंगु कुतःया विरोधय् म्हीग असनय् सभा जुल । १६ औं शताब्दीया अशोकवृक्ष विहार स्यंकाः अन व्यापारिक भवन दयेकेगु निर्णयया विरोधय् स्थानीय जनतां विरोध सभा याःगु खः ।
सभाय् न्ववासें नेकपाया सांसद रामवीर मानन्धरं ऐतिहासिक क्षेत्रय् गुगुं नं हालतय् व्यापारिक भवन दयेके मजिउगु खँ कनादिल । अथे हे पुलांम्ह मन्त्री लिसे कांग्रेसया नेता भीमसेनदास प्रधानं ऐतिहासिक सम्पदा ल्यंकेगु निंतिं फुक्कं जायेमाःगु खँ कनादिसें गुथि संस्थानं हे सम्पदायात नष्ट यायेगु ज्या याःगु धासें विरोध प्वंकादिल ।
संघीय समाजवादी पार्टीया केन्द्रिय नेता हिसिला यमिं असं थेंज्याःगु ऐतिहासिक लागाय् व्यापारिक भवन दयेकेगु उचित मजू धासें तत्काल गुथि संस्थानं याःगु टेण्डर रद्द यायेमाः धयादिल । नेपाल कम्युनिष्ट पार्टी (क्रान्तिकारी) या केन्द्रीय दुजः लिसें नेवाः मुक्ति मोर्चाया कोषाध्यक्ष सुरेश श्रेष्ठं प्राचीन सम्पदा बुलुहुँ न्हना वनाच्वंगु खँ कनादिसें थीथी शक्ति केन्द्रं अज्याःगु सम्पदायात कब्जा यायेगु प्रवृत्ति अप्वया वनाच्वंगुलिं सरकारं सम्पदा संरक्षण यायेगु निंतिं पलाः ल्ह्वनेमाः धयादिल । ज्याझ्वलय् मेपिं सम्पदा अधिकारकर्मी–तय्सं नं न्ववानादीगु खः ।
झिंप्यंगू परिवार च्वनाच्वंगु उगु विहारया नापी २०३३ सालय् जूगु खः । नापी जूगु इलय् झिंप्यगू परिवार च्वनाच्वंगुलिं मोहियानी हक कायम यायेत समस्या जूगुलिं सन्तान दर सन्तानं चले यायेगु कथं भ्वं तकं दयेकातःगु खः । उकी मध्ये छम्हेसित मोहियानी हक कायम यानातःगु दु । छखा छेँ पूरा चले याना वयाच्वंम्ह काजिलाल श्रेष्ठयात मोहियानी कायम यानातःगु खः ।
मेपिं झिंस्वखलः धाःसा मासिक बाः पुलेगु कथं च्वनाच्वंगु खः । गुथि संस्थान व उमिगु दथुइ न्यादँया निंतिं पसः चले यायेगु व वयां लिपा सम्झौता नवीकरण यायेगु धकाः सहमति जुयाच्वंगु खः । तर थःपिनि ई अझ दछि ल्यं दनिबलय् हे टेन्डर मार्फत ठेक्कां बीत्यंगु धासें उपिं आन्दोलित जूगु खः ।
गुथि संस्थानलिसे सहमति जूगु इलय् यदि छेँ दयेकेमाल धाःसा स्थानीय वासिन्दालिसे जानाः मंकाः कथं सांस्कृतिक सम्पदा मस्यनी कथं दयेकेगु सहमति जूगु खँ सम्बन्धित व्यवसायीं धाःगु दु ।
LEAVE YOUR COMMENTS