मल्ल के. सुन्दरयात विराट पूर्ण वैद्य सिरपाः

येँ – मदुम्ह आधुनिक कवि पूर्ण वैद्यया नामं नीस्वंगु ‘विराट पूर्ण वैद्य लुमंति सिरपाः’ नांजाःम्ह नेवाः न्ह्यलुवा लिसें साहित्यकार भाजु मल्ल के. सुन्दरयात लःल्हाइगु जूगु दु । विराट नेपालभाषा साहित्य सम्मेलन गुथिपाखें थ्व सिरपाः बीगु खः । थुगुसी नीस्वंगु थ्व न्हापांगु सिरपाः भाजु मल्ल के. सुन्दरयात बीगु निर्णय जूगु खः ।

थ्व सिरपाः १ लाख तका दां व हनापौ सहितया खः । म्हिगः च्वंगु विराटया सिरपाः समितिया मुँज्यां भाजु मल्लयात थ्व सिरपाः बीगु निर्णय याःगु खः ।

थुगुसी मोहनिबलय् कौलाथ्व द्वादशी (कार्तिक ९ गते) कुन्हु जुइगु विराटया ख्वीनिक्वःगु साहित्य सम्मेलनय् थ्व सिरपाः लःल्हाइगु ग्वसाः दु । थुगुसी विराटया साहित्य सम्मेलन ख्वपया बिकुमःछेँय् जुइ ।

विराटया उगु हे साहित्य सम्मेलनय् नेपालभाषा स्नातकोत्तर तगिमय् दकलय् अप्वः ल्याः हयाः पास जूपिं नेपालभाषा केन्द्रीय विभागया राकेशमान मास्के (२०७८) व अनिल स्थापित (२०७९) यात ‘विराट सुरत्न सिरपाः’ नं लःल्हाइ । लिसें एसईई तगिमय् नेपालभाषा विषयय् दकलय् अप्वः ल्याः हयाः उत्तिर्ण जूम्ह आदर्श मा.वि. लाय्कू थिमिया विद्यार्थी निकेश बसी श्रेष्ठयात ‘नेपालभाषा पदक’ नं लःल्हाइगु ग्वसाः दु ।