ने. सं. ११४४ कौलाथ्व पारू - नःलास्वनेगु

सगरमाथाय् च्वापु म्हो, मेगु च्वापुगुँ हाकुसे

येँ (नेपालभाषा टाइम्स)- इलय् च्वापु मगाःगु कारणं उत्तरी हिमाली जिल्ला सोलुखुम्बुया च्वापुगुँत फुक्क तुइसे च्वनेमाःथाय् हाकुसे खने दया वःगु दु । इलय् हे च्वापु गाःगु जूसां निभाः लाइबलय् टल्के जुयाः तुइसे च्वनेमाःगु च्वापुगुँत थौंकन्हय् च्वापु हे मदयाः हाकुसे खने दयाच्वंगु दु ।

थगुने तक थन मंसिर महिनाय् हे च्वापु गाइगु खःसा थुगुसी धाःसा माघ क्यनेधुंकाः तक नं च्वापु गाःगु मदुनि । स्थानीय मनूतय्सं धाःकथं अन आः नं तत्काल च्वापु गाइगु सम्भावना खने मदुनि ।

च्वापु मगाःगु कारणं यानाः उगु लागाय् बुँ नं सुके जुया वनाच्वंगु दु । वाली स्यनीगु सम्भावना अप्वया वःगु दु । सोलुखुम्बुया सदरमुकाम सल्लेरीं तप्यंक हे खने दइगु नुम्बुर हिमाल ला थौंकन्हय् हाकुसे च्वनाः कालापत्थर हे जुयाच्वंगु खँ स्थानीय मनूतय्सं धाःगु दु । तुइसे च्वनेमाःगु च्वापुगुँत फुक्क हाकुसे च्वना वःगुलिं थ्व थाय् हे मेगु थें च्वना वःगु खँ नं स्थानीय मनूतय्सं धाःगु दु ।

थौंकन्हय् हलिमय् दकलय् तजाःगु च्वापुगुँ सगरमाथा सहित ल्होत्से, नुत्से, पुमरी, आमादब्लम, कोङ्दे थेंज्याःगु चर्चित च्वापुगुँइ समेत च्वापुया मात्रा म्हो जुया वनाच्वंगु खँ धाःगु दु ।

विश्वव्यापी रुपं अप्वया वःगु ग्लोबल वार्मिङया लिच्वः कथं नेपाःया च्वापुगुँइ च्वापु म्हो जुया वनाच्वंगु खँ धाःगु दु । थुकिया बारे ताः इलंनिसें सः थ्वया वयाच्वंगु खः ।