बुंगय् नं मुआब्जा मबिसे डोजर चले यात

येँ – येँ–निजगढ फास्ट ट्रायकया प्रस्थान विन्दु जुइत्यंगु बुंगय् नं सेनां मुआब्जा मबिसे डोजर चले याःगु खँय् स्थानीय जनतां विरोध प्वंकूगु दु । सेनां अन ५० मिटर तब्यागु लँ दयेकेत ज्या न्ह्याकूगु खँ स्थानीय इन्द्रमान तुलाधरं ‘नेपालभाषा टाइम्स’ यात कनादिल ।

न्हापा जूगु सहमति अःखः सेनां ज्या न्ह्याकूगु धासें स्थानीय जनतां विरोध याःगु खः । रक्षामन्त्री ईश्वर पोखरेलया उपस्थितिइ सेना व स्थानीय दथुइ जूगु सहलहय् मुआब्जा अप्वयेकेगु सहमति जूगु खःसां नं आः मुआब्जायात छखे तयाः सेनां लँ दयेकेगु सुरु यायेवं स्थानीय जनतां विरोध याःगु खः ।

तुलाधरया कथं सेनां मुआब्जा थप यायेमाःगु प्रतिवेदन हे रक्षा मन्त्रालयय् छ्वःगु दु । तर थौंकन्हय् रक्षामन्त्री पोखरेलं उकिया बारे खँ ल्हानाच्वनेमाःगु आवश्यक मदु धायेगु यानाच्वंगु दु ।

पोखरेलं बुंग भ्रमण याःगु इलय् नं फयांफछि मुआब्जा अप्वयेकेगु बचं बियादीगु खँ कँसें भाजु तुलाधरं उगु इलय् रक्षामन्त्रीं धाःगु खँ नं लुमंकाः धयादी, ‘राज्य लिसे यक्व आशा याये मजिउ, फयां फक्व ‘विन विन’ थ्यौरीइ वनेमाः ।’

सरकारं बुंगया जग्गा प्रति रोपनी सतकय् लाःगु जूसा ४४ लाख, गोरेटो बाटो ३३ लाख व लँ मदुगु जूसा २५ लाख तका मुआब्जाया भाः क्वःछिनातःगु दु । तर थौंकन्हय् उगु लागाय् प्रति आना ७ लाखं निसें ८ लाख तका तक थ्यनाच्वंगु खँ भाजु तुलाधरं कनादी । थःपिंसं न्हापा मुआब्जा निं बिउ अले सडक दयेकेगु ज्या न्ह्याकि धकाः सेनायात इनाप यानागु खःसां नं सरकारं मुआब्जा बीत फ्यानातःगु ध्यबा काः हुँ धकाः बांलाक व्यवहार तकं मयाःगु द्वपं नं वय्कलं बियादिल ।

स्थानीय जनतां थःपिनि जग्गायात प्रचलित दरं मुआब्जा दयेमाः धकाः माग यानाच्वंगु खःसां उकियात वेवास्ता यानाः लँ दयेकेगु ज्या न्ह्यानाच्वंगुलिं आः आन्दोलन बाहेक मेगु विकल्प मदु धया हःगु दु ।

थौंकन्हय् अन सेना, प्रहरी पाः तयाः वा पीधुंकूगु जग्गाय् तकं डोजर चले यानाच्वंगु दु । थ्वहे झ्वलय् म्हिगः उगु लागाया सांसद पम्फा भुसालं सदनय् न्ववासें वा पीगु इलय् तत्काल डोजर बन्द यायेत इनाप यानादीगु दु । लिसें वय्कलं बाह्य चक्रपथ नं बुंग स्वयां झिगू किलोमिटर तापाक दयेकेमाःगु माग यानादीगु दु ।