ने. सं. ११४४ कौलाथ्व पारू - नःलास्वनेगु

पानीजहाज चले यायेत भारतलिसे सहलह

येँ – नेपालय् पानीजहाज चले यायेगु बारे सहलह यायेगु निंतिं भारतीय प्राविधिक सहितया छगू पुचः नेपाः वयेत्यंगु दु । थ्वहे वइगु मार्च महिनाय् भारतीय पुचः नेपाः वइगु खँ सीदुगु दु । भारतया सामुन्द्रिक बन्दरगाहनिसें नेपाःया बोर्डर तक पानीजहाज सञ्चालन यायेगु विषयसं सहलह यायेत प्राविधिक पुचः नेपाः वयेत्यंगु खः । भारतीय पुचःलिसे मार्च ३ निसें ९ तारिख तक येँय् सहलह जुइगु खँ धाःगु दु ।

भारतीय पुचलं थौंकन्हय् नेपाःया बोर्डर तक पानीजहाज चले यायेगु बारे डीपीआर दयेकेगु ज्या शुरु याःगु दु । निगू देय्या प्रतिनिधि दथुइ उगु हे प्रतिवेदनयात कयाः सहलह जुइगु खँ धाःगु दु । भारतीय कम्पनी इनल्यान्ड वाटर सर्भिसं डीपीआर दयेकेगु ज्या यानाच्वंगु दु ।
वंगु दँय् सरकारां जल तथा ऊर्जा आयोगया सहसचिव माधव बेल्वासेया संयोजकत्वय् खुम्ह दुजः दुगु कमिटी दयेकूगु खः । कमिटीं नेपाःपाखें भारतपाखे न्ह्यानाच्वंगु नारायणी व कोशी खुसिइ पानीजहाज सञ्चालन याये फइगु प्रतिवेदन सरकारयात बिउगु खः ।

अध्ययन कमिटीइ भौतिक पूर्वाधार तथा यातायात मन्त्रालय, उद्योग वाणिज्य तथा आपूर्ति मन्त्रालय व परराष्ट्र मन्त्रालयया प्रतिनिधिपिं दुजः कथं दुथ्याकातःगु दु । कमिटीं बिउगु प्रतिवेदन कथं नारायणी खुसिइ २७५ किलो मिटर व कोशीइ २४० किलोमिटर पानीजहाज सञ्चालन यानाः समुन्द्र तक थ्यंके फइगु खँ न्ह्यथनातःगु दु । थ्व निगू खुसिया लँ जुयाः भारतया गंगा जुयाः बंगलादेश तक थ्यनेफइगु खँ नं प्रतिवेदनय् न्ह्यथनातःगु दु ।

कमिटीं याःगु अध्ययनं ३०० निसें ५०० टन तकया पानीजहाज चले याये फइ । थज्याःगु जहाजया निंतिं खुसिया जाः १.६ निसें १.८ मिटर तक जुइमाः । पानीजहाज सञ्चालन जुल धाःसा कोलकातां नेपाःया बोर्डर तक ढुवानी यायेबलय् ७० प्रतिशत ढुवानी खर्च म्हो जुइगु खँ धाःगु दु ।
नेपाःया खुसिइ पानीजहाज चले यायेत सिंगापुरया व्यवसायी व छुं नेपाःमि व्यवसायीत नं उत्साहित जुयाच्वंगु खँ सीदुगु दु । तर नेपालं पानीजहाज चले यायेगु बारे ऐन दयेकेगु ज्या मयाःगुलिं प्रक्रिया धाःसा न्ह्याये फयाच्वंगु मदु ।

नेपालय् पानीजहाज सञ्चालन यायेगु निंतिं कमिटीया सुझाव कथं मन्त्रिपरिषद्या पुस २९ गतेया बैठकं ‘नेपाल पानीजहाज कार्यालय’ नं स्थापना यायेधुंकूगु दु । वइगु मार्चया बैठकय् पानीजहाज चले यायेगु बारे छुं निष्कर्ष पिकाइगु खँ धाःगु दु ।